जळगाव (प्रतिनिधी) पुण्याच्या आर्थिक गुन्हे शाखेच्या पथकाने सोमवारी बीएचआरचे एमआयडीसीतील कार्यालय व सुनील झंवर याचे खान्देश मिल कॉम्पलेक्समधील रमेश मोटार ड्रायव्हींग स्कुल नावाने असलेले कार्यालय सील केले आहे. एवढेच नव्हे तर या कार्यालयांच्या बाहेर पोलिसांचा २४ तास पहारा ठेवण्यात आला आहे.
दोन ट्रकभरुन कागदपत्रे, संगणक असे ठोस पुरावे तपासणीसाठी घेऊन गेल्यानंतर जिल्ह्यात प्रचंड खळबळ उडाली होती. जिल्ह्याच्या इतिहासातील ही सर्वात मोठी छापेमारी असल्याचे बोलले जात आहे. बीएचआर पतसंस्थेत कोट्यवधी रुपयांचा घोटाळा करण्यासाठी सुनील झंवरच्या सांगण्यावरुन बनावट वेबसाईट, अॅप तयार केल्याचे पोलीस तपासात समोर आले होते. त्यानंतर पोलिसांनी झंवरच्या कार्यालयाची झाडाझडती घेतली असता माजी मंत्री महाजन यांचे लेटरपॅड, महापालिकेच्या सफाई ठेक्याची कंपनी असलेल्या वॉटरग्रेसचे कागदपत्र तसेच १०० पेक्षा जास्त एटीएम कार्ड मिळुन आल्याचे वृत्त होते. त्या अनुशंगाने रविवारी दिवसभर पथकाने झंवरच्या कार्यालयातून महत्त्वाचे पुरावे गोळा केले. दुसरे एक पथक बीएचआरच्या शाखेत बसून चौकशी करीत होते. सर्व पुरावे हाती लागल्यानंतर हे दोन्ही कार्यालये आता सील करण्यात आले आहे. अशात कोणीही तेथे येऊन छेडछाड करु नये म्हणून स्थानिक पोलिसांना २४ तास पहारा असणार आहे.
