धानोरा ता. चोपडा (प्रतिनिधी)
येथिल अंगणवाडीत सेविका-मदतनीस यांनी स्वच्छता मोहीम राबवून परीसर स्वच्छ केला. सदर अंगणवाडीला संरक्षक भिंत बांधण्यात आली असून ठेकेदाराने आपले काम उरकून घेऊन घाण तेथेच राहु दिल्याने घाणीचे साम्राज्य निर्माण झाले आहे. याकडे ग्रामपंचायत प्रशासनाने जाणीव दूर्लक्ष केल्याने अंगणवाडीतील महीलांना सदर घाण साफ करावी लागली.
येथिल ग्रामपंचायत कार्यालयाला लागुनच अंगणवाडी केंद्र आहे. गेल्या महीन्यात चौदाव्या वित्त आयोगातुन संरक्षक भिंत बांधण्यात आली. यावेळी बांधकामाचे सर्व साहीत्य याच भागात पडून होते. यामुळे परीसरात घाण साचलेली आहे. अंगणवाडी च्या थेट मागच्या बाजुला पुरुष शौचालय असल्याने प्रचंड घाण होण्याचा प्रकार नेहमीचाच आहे. सोबत याच अंगणवाडीत रात्री जुगार अड्डे सुरु असतात. याठिकाणी जुगार खेळणा-यांनी गुटखा खाऊन भिंती रंगवलेल्या आहेत. तसेच मुख्य रस्त्यावरील काही दुकानदार या परीसरात लघुशंका करतात. या सर्व प्रकारांना येथिल महीलांना सामोरे जावे लागत आहे. या सर्व प्रकाराकडे महीला लोकप्रतिनिधी यांनी लक्ष देण्याची गरज आहे.
ग्रामपंचायत वर प्रशासक गेल्या महीनाभरापासुन प्रशासक आहेत. यामुळे ते आठवड्यात एक दिवस येऊन काम पाहत आहेत. प्रशासक जितेंद्र पाटील, ग्रामसेवक दिपक भामरे यांनी वसुली मोहीमेवर भर दिला असुन एकाच आठवड्यात तब्बल तीन ते चार लाख रुपये वसुल केले. तसेच अवैध नळकनेक्शन शोधमोहीम सुरु केलेली आहे. यामुळे प्रशासक यांनी विकास कामांकडे जसे लक्ष दिले तसेच स्वच्छता मोहीमेवर भर द्यावा अशी मागणी करण्यात येत आहे.
