धरणगाव (प्रतिनिधी) तालुक्यातील पाळधी येथील पोलीस स्थानकात कार्यरत सुमीत पाटील या पोलिस कॉन्स्टेबलला एसीबीच्या पथकाने १५ हजारांची लाच स्वीकारताना रंगेहात अटक केली होती. न्यायालयाने आज या पोलिस कॉन्स्टेबलला एका दिवसाची पोलीस कोठडी सुनावली आहे.
या संदर्भात अधिक असे की, तक्रारदाराच्या चालकाकडून काही दिवसांपूर्वी अपघात होवून एका व्यक्तीचा मृत्यू झाला होता. गुन्हा दाखल झाल्यानंतर चारचाकी वाहन जप्त करण्यात आले होते. त्यानंतर २९ डिसेंबर रोजी गुन्ह्यातील वाहन सोडण्यासह आरोपी चालकाला गुन्ह्यात मदत करण्यासाठी पो.कॉ. सुमीत पाटील यांनी लाच मागितली होती. मात्र लाच द्यावयाची नसल्याने तक्रारदाराने एसीबीकडे तक्रार नोंदवल्यानंतर सोमवारी सापळा रचण्यात आला होता. त्यानुसार लाच स्वीकारताच त्यास अटक करण्यात आली. पोलिस उपअधीक्षक गोपाळ ठाकूर यांच्या मार्गदर्शनाखाली ही कारवाई करण्यात आली होती. दरम्यान, आज न्यायालयाने पो.कॉ. सुमीत पाटील एका दिवसाची पोलीस कोठडी सुनावली. पोलिसांनी पाच दिवसांची पोलीस कोठडीची मागणी केली होती. परंतू न्यायालयाने एका दिवसाची पोलीस कोठडी सुनावली. सरकार पक्षातर्फे अॅड. केतन ढाके तर आरोपीकडून अॅड. कुणाल पवार यांनी कामकाज पहिले.
