भडगाव ( प्रतिनिधी) एरंडोल तालुक्यातील कासोदा-आडगाव येथे आज सायंकाळी साडे पाच वाजेच्या दरम्यान विजेच्या कडकडासह अवकाळी पाऊस झाला. त्यात टोळी शिवारात शेती काम करीत असलेल्या दोन तरूण शेतकऱ्यांच्या अंगावर विज कोसळल्याने त्यांचा जागीच मृत्यू झाल्याची घटना आज घडली. रविंद्र प्रभाकर महाजन(२३) व महेंद्र उखर्डु पाटील(२६) अशी मयतांची नावे आहेत. नवरात्रीच्या पहिल्या माळ्याला ही घटना घडल्याने परिसरात हळहळ व्यक्त होत आहे.
रविंद्र महाजन व महेंद्र पाटील हे अडगाव – अंजनविहीरे रस्त्यावर असलेल्या टोळी शिवारात आपल्या स्वतःच्या शेतात शेती काम करीत असतांना अचानक आलेल्या पावसामुळे विजांचा कडकडाट झाला. यावेळी रविंद्र महाजन व महेंद्र पाटील यांच्या अंगावर विज कोसळल्याने त्यांचा जागीच मृत्यू झाला. ही घटना लक्षात येताच परिसरातील शेतकऱ्यांनी आडगाव पोलिस पाटील यांना माहिती दिली. या प्रकरणी आडगाव पोलीस पाटील नितीन भावसारे यांनी पोलिसांना माहिती देताच पोलिस घटनास्थळी दाखल झाले. या दोघा तरूण शेतकऱ्यांचा मृत देह कासोदा ग्रामीण रूग्णालयात शवविच्छदनासाठी नेण्यात आला. यावेळी तरुण शेतकऱ्यांचा मृतदेह पाहुन कुटूंबियांनी एकच हंबरडा फोडला. या प्रकरणी कासोदा पोलिस ठाण्यात अकस्मात मृत्यूची नोंद करण्यात आली असुन पुढील तपास पोलीस निरीक्षक जाधव यांच्या मार्गदर्शनाखाली भागवत पाटील व शरद पाटील हे करीत आहेत.
