मुंबई (वृत्तसंस्था) नवी मुंबईतील वाशीमध्ये ८ ऑगस्ट २०१९ रोजी नो पार्किंगचा दंड आकारण्यावरून पोलिसांसोबत वाद झाल्यानंतर एक वर्षापासून झोमॅटोची डिलिव्हरी गर्ल प्रियांका मोगरे ही कारागृहातच असल्याची धक्कादायक माहिती समोर आली आहे.
याबाबत ‘द वायर’ने वृत्त प्रकशित केले आहे. नवी मुंबईतील वाशीमधील एक व्हिडीओ व्हायरल झाला होता. यात ‘ झोमॅटो साठी काम करणारी प्रियांका मोगरे पोलिसांना शिवीगाळ करताना दिसत होती. त्यानंतर हा व्हिडीओ मुंबई पोलिसांपर्यंत पोहोचला. तिच्यावर भादवि. कलम ३५३, ३९३, २९४, ५०४, ५०६ अंतर्गत वाशी पोलीस स्थानकात गुन्हा दाखल करण्यात आला होता. त्यानंतर तिला पोलिसांनी तिला अटक केली होती. ‘द वायर’ने आपल्या वृत्तात म्हटले आहे की, प्रियांकाने रागाच्या भरात पोलिसांना शिवीगाळ केली. परंतू एका छोट्या गुन्ह्यासाठी तिला वर्षभर तुरुंगात राहावे लागले. अगोदर पोलिस कस्टडी आणि नंतर न्यायालयीन कस्टडी मिळाली. तिला जामीन मिळण्यासाठीचा पहिला अर्ज फेटाळण्यात आला. नंतर तिला सप्टेंबर २०१९ मध्ये जामीन मंजूर करण्यात आला. मात्र तिच्या जामीनासाठी २ व्यक्तीही पुढे आल्या नाहीत. तेव्हापासून आजपर्यंत प्रियांका भायखळा येथील तुरुंगात आहे. फेब्रुवारी महिन्यामध्ये ‘प्रयास’ ही संस्था प्रियांकाच्या मदतीसाठी पुढे आली. त्यांनी तिच्यावतीने न्यायालयात अर्ज करून तिला वैयक्तिक हमीवर सोडण्याची विनंती केली, पण तो अर्ज फेटाळण्यात आला. अंडर ट्रायल कैद्यांसाठी ‘प्रयास’ ही संस्था मदत देण्याचे काम करते. ‘प्रयास’च्या कार्यकर्त्या रमा काळे यांनी प्रियांका बाहेर यावी यासाठी प्रयत्न सुरू केले. तिचे नातेवाईक शोधणे, त्यांना मदतीसाठी आवाहन करणे, असे काम त्यांनी सुरू केले. पण मध्येच कोरोनाची साथ आली आणि सगळ्याच गोष्टी बंद झाल्या.
दरम्यानच्या काळामध्ये पोलिसांनी प्रियंका प्रकरणाची फाईलच न्यायालयात पाठवली नाही. वाशी येथील न्यायालय ते ठाण्याचे सत्र न्यायालय अशा अनेक चकरा रमा काळे यांना माराव्या लागल्या. आता पुन्हा रमा काळे यांनी प्रयत्न सुरू केले. ‘प्रयास’तर्फे अॅड. भुजंगराव मोरे यांनी जामिनाचे रूपांतर रोख रकमेच्या स्वरूपात करण्यासाठी ठाण्याच्या सत्र न्यायालयात पुन्हा अर्ज केला आणि या सप्टेंबर महिन्यात २१ तारखेला न्यायालयाने अर्ज मंजूर केला. २५ हजार रु. रोख रक्कम न्यायालयात जमा करण्याच्या अटीवर प्रियांकाला जामिनावर सोडण्याचे आदेश न्यायालयाने दिले आहेत. मात्र प्रियांकाला एक महिन्याच्या आत दोन जामीनदार मिळवावे लागणार आहेत.
