नवी दिल्ली (वृत्तसंस्था) राष्ट्रीय अन्वेषण एजन्सी (एनआयए)ने पश्चिम बंगालमधील मुर्शिदाबाद आणि केरळमधील एर्नाकुलम येथे छापे टाकून अल कायदाच्या तब्बल ९ दहशतवाद्यांना अटक करण्यात आली आहे. एनआयएने एकाच वेळी ११ ठिकाणी छापे टाकले आहेत.अटक केलेल्या दहशतवाद्यांमध्ये लियु यीन अहमद आणि अबु सूफियान पश्चिम बंगालचे, तर मुशर्रफ हुसेन आणि मुर्शीद हसन केरळचे आहेत. या लोकांवर दिल्ली एनसीआर आणि वर्दळीच्या ठिकाणी बॉम्बस्फोट करण्याची जबाबदारी सोपवली होती. एनआयएची कारवाई अद्याप सुरूच आहे.
राजधानी दिल्लीसह अनेक महत्त्वाच्या ठिकाणी हल्ला करण्याचा, मोठा घातपात घडवण्याचा अल-कायदाच्या दहशतवाद्यांच्या कट होता. मात्र एनआयने कारवाई करत त्यांच्या हा कट उधळून लावला आहे. अटक करण्यात आलेले सर्व दहशतवादी हे सोशल मीडियाच्या माध्यमातून पाकिस्तानातील दहशतवादी संघटना अल-कायद्याशी संबंधित असल्याची माहिती प्राथमिक तपासातून समोर आली आहे.
तसेच अटक केलेल्या दहशतवाद्यांकडून मोठ्या प्रमाणात चिथावणीखोर साहित्य, डिजिटल उपकरणे, कागदपत्रे, जिहादी साहित्य, धारदार शस्त्रे जप्त करण्यात आली आहेत. सुरुवातीच्या चौकशीनुसार अटक केलेल्या सर्वजणांना सोशल मीडियावरुन पाकिस्तान स्थित अल-कायदाच्या दहशतवाद्यांच्या माध्यमातून द्वारा कट्टरपंथी बनवले होते. राजधानी दिल्लीसह देशातील काही ठिकाणी हल्ला करण्यासाठी त्यांना तयार केले जात होते. एआयएने म्हटले आहे की, या प्रकरणात आणखी काही जणांना अटक केले जाऊ शकते. ही टोळी मोठ्या प्रमाणात पैसे लुटण्याचे धंदे करायची. यातील काही सदस्य हत्यारं आणि गोळाबारुदांच्या खरेदीसाठी दिल्लीला येण्याची योजना आखत होते, अशी माहिती आहे.
