परभणी (वृत्तसंस्था) शहरातील एका बालरोग तज्ज्ञाचे जुने फोटो व्हायरल करण्याची धमकी देत डॉक्टरकडून दोन महिन्यांपूर्वी जवळपास २० लाख रुपयांची खंडणी उकळल्या प्रकरणी शहरातील नवा मोंढा पोलीस ठाण्यात गुन्हा दाखल करण्यात आला आहे.
शहरातील डॉक्टराने नवा मोंढा पोलीस ठाण्यास माहिती दिली. मागील नऊ वर्षांपासून एकबालनगर परिसरात त्यांचे रुग्णालय आहे. सहा वर्षांपूर्वी त्यांच्या रुग्णालयात चार महिन्यांच्या प्रॅक्टीससाठी आलेल्या एका महिला डॉक्टरशी त्यांची ओळख झाली. या ओळखी दरम्यान त्यांनी एकमेकांच्या संमतीने मोबाइलमध्ये फोटो घेतले होते. ते फोटो बॅकअप म्हणून रूग्णालयाच्या मेडिकलवर काम करणाऱ्या सय्यद आसदउल्ला यांच्या मोबाइलमध्ये ठेवले. त्यानंतर त्यांनी सदर फोटो दोन्ही मोबाईलमधून डिलीट केले होते.
दरम्यान, सदर फोटो व्हायरल करण्याची धमकी देत त्यांच्याकडून २० लाखांपर्यंतची खंडणी वसुली करण्यात आली. यासाठी आरोपीने प्रारंभी त्यांना जिंतूर-औंढा रोडवर बोलावले होते. त्यानंतर आरोपीने १७ नोव्हेंबर रोजी २ लाख, १८ नोव्हेंबर रोजी ३ लाख आणि २० नोव्हेंबर रोजी १५ लाख रुपये असे एकूण २० लाख रूपये खंडणी वेगवेगळ्या ठिकाणी बोलावून उकळली.
या प्रकरणात शेख रहीम शेख कलीम, सुफीयान खान अकबर खान, मोहम्मद खुदुस सैफुल्ला बरेखानी आणि त्यांचा अन्य एक साथीदार या चौघांनी डॉक्टरविरूद्ध कट रचून व्हॉटसअॅप मॅसेज करून फिर्यादी डॉक्टरचे महिला डॉक्टरसोबतचे फोटो व्हायरल करण्याची धमकी देत सदर खंडणी वसूल केली. सदर माहितीवरून नवा मोंढा ठाण्यात गुन्हा नोंद करण्यात आला आहे. दरम्यान, तीन संशयिताना पोलिसांनी ताब्यात घेतल्याचे कळते.
