धरणगाव (प्रतिनिधी) एरंडोल तालुक्यातील सावदा प्र.चा येथील बस स्थानकाजवळ दि.१० रोजी मध्यरात्री १२ ते ४ वाजेच्या सुमारास अनोळखी इसमांनी एका २५ वर्षीय तरुणाच्या डोक्यात दगड टाकून खून केल्याची धक्कादायक घटना उघडकीस आली आहे. याप्रकरणी धरणगाव पोलिसात गुन्हा दाखल करण्याचे काम सुरु होते.
एरंडोल तालुक्यातील सावदा प्र.चा या गावात दि.१० रोजी मध्यरात्रीच्या सुमारास याच गावातील जुनी भिलाटी येथील रहिवासी इंदल प्रकाश वाघ (वय २५) हा दगड फोडून आपल्या परिवाराचा उदरनिवार्ह करीत होता. प्रकाश हा दि.१० रोजी रात्री १० वाजेच्या सुमारास घरून बाहेर पडला. त्यानंतर बस स्थानकानजीक रात्री १२ ते पहाटे ४ वाजेच्या दरम्यान काही अनोळखी इसमांनी त्याच्या डोक्यात दगड टाकून खून करण्यात आल्याची धक्कादायक घटना पहाटे ५ वाजेच्या सुमारास उघडकीस आली.
घटनेची माहिती मिळताच सावदा गावाचे पोलीस पाटील पवार यांनी याबाबत पोलिसांना कळविले. धरणगाव पोलीस निरीक्षक पवन देसले, प्रभारी एपीआय प्रशांत कंडारे, पोलीस हवालदार वसंत निकम, पोलीस शिपाई प्रदीप सोनवणे, मोहन पाटील यांनी घटनास्थळी धाव घेत मृतदेह जळगाव जिल्हा सामान्य रुग्णालय येथे हलविला. शासकीय वैद्यकीय महाविद्यालयाचे सीएमओ निरंजन देशमुख यांनी त्याला मयत घोषित केले.
