एरंडोल / भडगाव (प्रतिनिधी) एरंडोल तालुक्यातील आडगाव येथील शेतकरी तुकाराम हिलाल महाजन यांच्या शेतात रात्री बिबट्याने गायीवर हल्ला करून तिला ठार केले. दुसरीकडे भडगाव तालुक्यातील मळगाव शिवारात हिंस्त्र प्राण्यांच्या हल्ल्यात चार जनावरे जखमी झाली आहेत.
एरंडोल वन विभागाचे कर्मचारी विजय महाजन यांनी घटनास्थळी पंचनामा केला. यामुळे गावात भितीचे वातावरण पसरले आहे. वन विभागातर्फे गावात दवंडी देऊन नागरिकांना सतर्क राहण्याचे आवाहन करण्यात आले. दरम्यान, यापूर्वी १३ मार्चला पोलिस कर्मचारी भडगाव येथून एरंडोल मार्गे जळगाव येत असताना त्यांना पिंपरखेड ते आडगाव रस्त्यावर एका शेताच्या बांधावर बिबट्या दिसला होता.
चार जनावरे जखमी शेतकरी, पशुपालकांमध्ये घबराट
भडगाव तालुक्यातील मळगाव शिवारात हिंस्त्र प्राण्यांनी धुमाकूळ घातला आहे. या प्राण्यांच्या हल्ल्यात आहे. शेतात बांधलेल्या ४ जनावरांना जखमी केल्याची घटना घडली आहे. यामुळे शेतकरी, पशुमालकांमध्ये भीतीचे वातावरण पसरले आहे.
मळगाव शेत शिवारात गायी, म्हशी, बैल आदी जनावरे झाडांखाली झोपड्यांजवळ बांधलेली असतात. दि. १२ रोजी रात्री मुरलीधर गंगादास बैरागी यांच्या शेतात बांधलेल्या बैलावर या अज्ञात हिंस्त्र प्राण्याने हल्ला करीत जखमी केले. बैलासह जनावरांनी आरडाओरड केल्याने शेतात असलेल्या शेतकऱ्यांनी या प्राण्याला हाकलून लावले. अंधारात हा प्राणी पसार झाला.
दि.१६ रोजी रमेश कौतिक पाटील यांचे शेतात बांधलेल्या वासरी व रेडा अशा दोन्ही जनावरांवर हल्ला करीत त्यांना जखमी केले आहे. रघुनाथ तुळशीराम पाटील यांच्या शेतात बांधलेली गाय जखमी केल्याची घटना घडली. जनावरांनी आरडाओरड केल्याने शेजारच्या शेतकऱ्यांनी जनावरांकडे धाव घेतली. गावात शेतकऱ्यांना ही वार्ता कळताच गावातील ३० ते ३५ शेतकऱ्यांनी काठ्या बॅटऱ्या हातात घेत शेतात घटनास्थळी मदतीसाठी धाव घेतली. त्यावेळेस अंधारात हा प्राणी पसार झाला.
