जळगाव (प्रतिनिधी) शहरातील मुक्ताईनगर नगरात मुलगी घरी एकटे असल्याची संधी पिण्यासाठी पाणी मागत दरोडेखोरांनी दरोडा टाकण्याचा प्रयत्न केला, मात्र घरात एकट्या असलेल्या दहा वर्षीय मुलीने हिंमत दाखविल्यामुळे हा दरोडेखोरांचा दरोड्यांचा प्रयत्न फसला आहे. यावेळी दरोडेखोरांनी दरवाजा तोडून आतमध्ये येवू असे मुलीला धमकावले होते, मात्र मुलीने अजिबात न घाबरता दरवाजा न उघडून हिंमतीने दरोडेखोरांना परतवून लावले. दरम्यान याबाबत जिल्हापेठ पोलीस स्टेशनला तक्रार नोंदवण्यात आली आहे. भर दिवसाच्या घटनेने जळगावात खळबळ उडाली आहे.
जळगाव शहरातील मुक्ताईनगरात एस.एम.आय.टी. महाविद्यालाजवळ ॲड सचिन देविदास पाटील (वय ४३) हे पत्नी विद्या पाटील व दहा वर्षीय मुलगी श्रृंगी या परिवारासह वास्तव्यास आहेत. सचिन पाटील हे जिल्हा न्यायालयात वकील व्यवसाय करतात तर त्यांच्या पत्नी विद्या पाटील जळगाव शहरातील एका शाळेत शिक्षिका आहेत. बुधवारी सचिन पाटील व विद्या पाटील हे दोन्ही नोकरीवर निघून गेले. दुपारी श्रृंगी ही शाळेतून घरी परतली, ती घरी एकटीच होती.
दरोडेखोरांचा प्लॅन..मात्र तो सक्सेस झाला नाही…
दुपारी २ वाजता काही अज्ञात दरोडेखोर दरोडा टाकण्याच्या उद्देशाने घरी आले. त्यातील एकाने दरवाजा ठोठावला . लोखंडी ग्रीलींगच्या दरवाजाला आतून कुलूप लावलेले होते, आवाज ऐकून श्रृंगी हिने लाकडी दरवाजा उघडला. त्यातील एका दरोडखोराने पिण्यासाठी पाणी मागितले, अनोळखी वाटत असल्याने श्रृंगी हिने पाणी देण्यास नकार देत याठिकाणाहून जात अस सांगितले, व दरवाजा बंद करून घेतला, यानंतर दरोडेखोराने पाणी पाज नाहीतर दरवाजा तोडून आतमध्ये घुसेल असे सांगितले, मात्र मात्र शृंगीने हिम्मत दाखवून दरवाजा अजिबात उघडला नाही. तब्बल १५ मिनिटे दरोडेखोर दरवाजाजवळ थांबून होते, मात्र श्रृंगीने त्यांना कुठलाही प्रतिसाद दिला नाही. खिडकीतून श्रृंगी हिला एका झाडाखाली एका रिक्षात आणखी चार ते पाच जण दिसले. त्यातील एक जण ‘प्लॅन सक्सेस झालाय’ असे बोलत असल्याचे तिने ऐकले. अखेरपर्यंत श्रृंगीने कुठलाही प्रतिसाद न देता दरवाजा न उघडला नाही, त्यानंतर दरोडेखोर आल्या मार्गाने निघून गेले.
भर दुपारी वर्दळीच्या परिसरातील घटनेने खळबळ…
खिडकीतून श्रृंगीने शेजारच्यांना आवाज दिला, त्यानुसार शेजारीची महिला धावतच श्रृंगी हिच्याकडे आली, महिलेला सर्व श्रृंगी हिने घडलेला प्रकार सांगितला. त्यानंतर श्रृंगी हिची आई विद्या पाटील ह्या सुध्दा घरी आल्या व सायंकाळी ॲड सचिन पाटील हे सुध्दा घरी परतले. यावेळी श्रृंगी हिने तिच्यासोबत घडलेली सर्व हकीकत सांगितली. त्यानंतर ॲड सचिन पाटील हे सुध्दा अवाक्‌ झाले, त्यांनी तातडीने तक्रारीसाठी रात्री दहा वाजता जिल्हापेठ पोलीस ठाणे गाठले. ॲड सचिन पाटील यांनी दिलेल्या तक्रारीनुसार पोलीस ठाण्यात नोंद करण्यात आली आहे. रात्री बारा वाजता पोलिसांनी वकिलांच्या घरी जाऊन घटनेची माहिती जाणून घेतली. दरम्यान पोलीस प्रकरणाची माहिती घेत असून पुढील कार्यवाही करीत आहेत. दरम्यान दरोडखोर हे साध्या रिक्षातून नव्हे महिलांच्या पिंक या रिक्षातून आले असल्याची माहिती समोर आली आहे. भर दुपारच्या वर्दळीच्या परिसरातील घटनेने खळबळ उडाली आहे.
श्रृंगी हिच्या धाडसाचे सर्वत्र कौतुक….
श्रृंगी ही जळगावातील सेंट टेरेसा या स्कूलमध्ये इयत्ता चौथीच्या वर्गात शिक्षण घेत आहे, दरम्यान घरात एकट्या असलेल्या श्रृंगी हिने धाडस दाखविले अन् न घाबरता, दरोडेखोरांना कुठलाही प्रतिसाद दिला, नाही मोठी दुर्घटना टळली आहे, अन्यथा पाणी पिण्याच्या बहाण्याने दरोडेखोर घरात घुसले आणि अनर्थ घडला असता. श्रृंगी हिच्या धाडसाचे सर्वत्र कौतुक केले जात आहे.
