भंडारा (वृत्तसंस्था) रानडुकराने दुचाकीला दिलेल्या धडकेत तरुणाचा मृत्यू झाल्याची दुर्दैवी घटना घटना मंगळवारी (१२ सप्टेंबर) रात्री घडली. मनोज तुकाराम देशमुख (वय २३, रा. पहेला, ता. भंडारा) असे मयत तरुणाचे नाव आहे.
या संदर्भात अधिक असे की, मनोज हा त्याचा मित्र स्वप्निल मलोडे यांच्यासोबत कोंढा येथून काम आटोपून दुचाकीने आपल्या घरी पहेला गावी जात होता. मंगळवारी रात्री ८.४५ वाजेच्या सुमारास डॉ. अरुण मोटघरे कॉलेजजवळ रानडुक्कर रस्त्यावर आल्याने दुचाकीला जबर धडक बसली. यामुळे दुचाकीवरील दोघेही मित्र रस्त्यावर पडले. यात मनोजच्या डोक्याला गंभीर मार लागल्याने त्याला उपचारासाठी भंडारा येथील रुग्णालयात दाखल करण्यात आले. मात्र, उपचारादरम्यान बुधवारी (१३ सप्टेंबर) त्याचा मृत्यू झाला. या प्रकरणी पोलीस स्टेशन अड्याळ येथे कलम १७४ अन्वये गुन्ह्याची नोंद करण्यात आली. पुढील तपास फौजदार सुभाष मस्के करीत आहेत.
