जामनेर (प्रतिनिधी) घराजवळ काम करीत असताना राजू संतोष गायकवाड (वय 27) या तरुणाच्या डाव्या हाताला सर्पदंशामुळे त्याचा मृत्यू झाल्याची धक्कादायक घटना शुक्रवार १३ सप्टेंबर रोजी रात्री ८ वाजेच्या सुमारास जामनेर तालुक्यातील गारखेडा येथे घडली आहे. याप्रकरणी जिल्हापेठ पोलीस स्टेशनला प्राथमिक नोंद घेण्याचे काम सुरू होते.
जामनेर तालुक्यातील गारखेडा येथील राजीव गायकवाड आधारस्तंभ आई, भाऊ, पत्नी व दोन मुलांसह वास्तव्याला होता. शेती काम करून तो आपला उदरनिर्वाह करत होता. शुक्रवारी १३ सप्टेंबर रोजी रात्री आठ वाजेच्या सुमारास घराजवळ तो काम करीत असताना त्याला विषारी सापाने चावा घेतला. कुटुंबीयांनी त्याला जामनेर उपजिल्हा रुग्णालयात आणले.
त्यानंतर पुढील उपचारासाठी जळगाव येथील शासकीय वैद्यकीय महाविद्यालय व रुग्णालयात दाखल केले असता त्या ठिकाणी वैद्यकीय अधिकारी डॉ. निखिल तायडे यांनी तपासून मयत घोषित केले. यावेळी कुटुंबीयांनी एकच आक्रोश केला. दरम्यान घरातील कर्ता पुरुष दगावल्यामुळे गायकवाड परिवारावर मोठा दुःखाचा डोंगर कोसळला आहे. गारखेडा येथे शोककळा पसरली असून डाव्या हातावर असलेल्या चाव्यावरून तो नाग जातीचा साप असावा अशी माहिती सर्पतज्ज्ञ राजेश सोनवणे यांनी दिली.
