जळगाव (प्रतिनिधी) : दरोड्याच्या गंभीर गुन्ह्यात फरार असलेल्या आरोपीस नशिराबाद पोलिसांनी कोंबिंग ऑपरेशनदरम्यान गावठी कट्ट्यासह अटक केल्याची धडक कारवाई समोर आली आहे. या घटनेमुळे परिसरात एकच खळबळ उडाली आहे.
दिनांक २३ मार्च २०२६ रोजी सायंकाळी ४ ते रात्री ११ या वेळेत पोलीस अधीक्षक यांच्या आदेशान्वये नशिराबाद पोलीस स्टेशन हद्दीत विशेष कोंबिंग ऑपरेशन राबविण्यात येत होते. यावेळी सहाय्यक पोलीस निरीक्षक योगिता नारखेडे यांना गुप्त माहिती मिळाली की, भुसावळ शहर पोलीस स्टेशन येथे दाखल असलेल्या दरोड्याच्या गुन्ह्यातील फरार आरोपी चेतन सूर्यभान पाटील हा नशिराबाद बसस्थानक परिसरात गावठी कट्टा घेऊन दहशत निर्माण करत फिरत आहे.
मिळालेल्या माहितीनुसार तात्काळ पोलिस पथकाने सापळा रचत रात्री ८.२० वाजता अचानक छापा टाकला. यावेळी आरोपीला घटनास्थळीच पकडण्यात यश आले. त्याच्या ताब्यातून एक लोखंडी, चंदेरी रंगाचा व काळ्या प्लास्टिकच्या मुठीचा गावठी कट्टा तसेच एक डमी कट्टा जप्त करण्यात आला.
अटक करण्यात आलेला आरोपी चेतन सूर्यभान पाटील (वय १८, रा. वरची आळी, नशिराबाद, ता. जि. जळगाव) असून त्याच्याविरोधात नशिराबाद पोलीस ठाण्यात शस्त्र अधिनियम कलम ३/२५ अन्वये गुन्हा दाखल करण्यात आला आहे. या प्रकरणाचा पुढील तपास पोलीस हेडकॉन्स्टेबल प्रशांत विरणारे करत आहेत.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते तसेच भुसावळ उपविभागीय पोलीस अधिकारी केदार बारब्रोले यांच्या मार्गदर्शनाखाली पार पडली. सहाय्यक पोलीस निरीक्षक योगिता नारखेडे यांच्या नेतृत्वाखाली राजेश मेंढे, कमलाकर बागुल, भरत बाविस्कर, पंकज सोनवणे, भूषण पाटील आणि विजय अहिरे यांच्या पथकाने ही यशस्वी कारवाई केली.
