औरंगाबाद (वृत्तसंस्था) नगररचना विभागातील शाखा अभियंता संजय चामले यांच्यावर लाचलुचपत प्रतिबंधक विभागाने छापा टाकला. विशेष म्हणजे हा छापा चामले यांच्या घरी टाकण्यात आला. छाप्यादरम्यान चामले तीन लाख रुपयांची लाच घेताना पकडले गेले. चामले यांच्या निवासस्थानी ‘एसीबी’ने छापा टाकल्यानंतर सातारा-देवळाई भागातील नागरिकांनी फटाके फोडून आनंद साजरा केला.
नगररचना विभागात संजय चामले शाखा अभियंता असले, तरी त्यांच्याकडे गुंठेवारी कक्ष प्रमुख म्हणून काम देण्यात आले होते. सातारा-देवळाईचा परिसरदेखील त्यांच्याकडेच होता. या भागातील ले-आउटला मंजुरी देणे, बांधकाम परवानगीची प्रकरणे हाताळणे, भोगवटा प्रमाणपत्रांबद्दल निर्णय घेणे, आदी कामे त्यांच्या आदेशानेच होत होती. त्यात नागरिक भरडून निघत होते. सूत्रांनी दिलेल्या माहितीनुसार, गुंठेवारी कक्षाकडे १४२७ प्रकरणे प्रलंबित आहेत. त्यातील सत्तर ते ऐंशी टक्के प्रकरणे सातारा-देवळाई भागातील आहेत. चामले ‘एसीबी’च्या जाळ्यात अडकल्यामुळे नगररचना विभागातील काही अधिकारी-कर्मचाऱ्यांचे धाबे दणाणले आहे. चामलेंचे ‘एसीबी’तील प्रकरण मिटावे, यासाठी काही अधिकारी कारवाई झाल्यानंतर लगेच कामाला लागले होते, अशी चर्चा आहे. ‘एसीबी’च्या चौकशीत चामले यांनी काही अधिकाऱ्यांची नावे घेतली, तर पालिकेचा नगररचना विभागात संकटात सापडू शकतो, असे मानले जात आहे.
पालिकेच्या नगररचना विभागात दलालांचादेखील मोठ्या प्रमाणावर हस्तक्षेप आहे. आवक-जावक विभागातील फायली हाताळण्यापासून विविध शाखा अभियंता, उपअभियंत्यांच्या टेबलवरच्या, कपाटातल्या फायली हाताळण्यापर्यंत, त्या ताब्यात घेऊन त्यांच्या झेरॉक्स काढण्यापर्यंत या दलालांची मजल गेली आहे. काही ‘अवघड, अडचणींच्या’ फाइल दलालांच्या माध्यमातून ‘पुट-अप’ झाल्यास त्यांना लवकर मान्यता मिळते अशीदेखील चर्चा आहे.
