धरणगाव (प्रतिनिधी) शहरासह तालुक्यातील ग्रामीण भागातून मोटार सायकल चोरणाऱ्या टोळीतील ८ जणांना आज दोन गुन्ह्यात जामीन झाला. परंतू अमळनेर पोलिसांनी या सर्वांना मोटार सायकल चोरीच्या गुन्ह्यातच ताब्यात घेतले आहे.
या संदर्भात अधिक असे की, मागील काही दिवसापासून शहरासह तालुक्यातील ग्रामीण भागातून मोटार सायकल चोरीला जाण्याचे प्रमाण वाढले होते. तेव्हापासून पोलीस चोरट्यांच्या मागावरच होते. परंतू गुरुवारी (१९ मे) मध्यरात्री चोरट्यांनी चक्क एका पोलीस अधिकाऱ्याचीच दुचाकी लांबवली. त्यानंतर पोलिसांनी काही संशयिताना पकडले. त्यात १) यश दिनेश सातपुते २) तुषार बत्तीसे ३) वैभव उर्फ विक्की हेमंत चौधरी ४) मनीष ऊर्फ भुर्या योगेश चौधरी ५) सय्यद पीरण सय्यद मुख्तार यांचा समावेश होता. दरम्यान, या संशयितांनी धुळे येथे ज्यांना मोटार सायकल विकल्या अशा ६) वैभव उर्फ दादू सुरेश मोरे ७) हसन उर्फ अली मोहम्मद शेख ८) वसीम शेख बिस्मिल्ला यांना देखील पोलीसांनी अटक केली होती. त्यानंतर त्यांना दोन दिवसाची पोलीस कोठडी सुनावण्यात आली होती. आज पोलीस कोठडी संपल्या नंतर न्यायालयात हजर केले असता सर्वांची पहिल्या गुन्ह्यात जामिनावर सुटका झाली. परंतू धरणगाव पोलिसांनी दुसऱ्या गुन्ह्यात ताब्यात घेतले. त्यातही लागलीच जामीन झाला. परंतु अमळनेर पोलिसांनी संत सखाराम महाराज यात्रेतून चोरीला गेलेल्या एका मोटार सायकलच्या गुन्ह्यात या टोळीला ताब्यात घेतले आहे.
