जळगाव (प्रतिनिधी) – घरी सोडण्याच्या बहाण्याने दुचाकीवर घेऊन जात सात वर्षीय बालिकेवर अत्याचार करणाऱ्या आकाश उर्फ सुपड्या विठ्ठल पाटील (वय २९, रा. चाळीसगाव) याला २० वर्षे कारावास व दंड अशी शिक्षा सुनावण्यात आली. हा निकाल सत्र व विशेष न्या. पी.पी. बनकर यांनी दिला आहे.
चाळीसगाव शहर पोलिस ठाण्याच्या हद्दीतील ७ वर्षीय बालिका दि. १२ मे २०२३ रोजी घरी पायी जात असताना आकाश पाटील हा तिला दुचाकीवर घरी सोडण्याच्या बहाण्याने घेऊन गेला आणि तिच्यावर अत्याचार केला होता. या प्रकरणी चाळीसगाव शहर पोलिस ठाण्यात गुन्हा दाखल होऊन न्यायालयात दोषारोपपत्र दाखल करण्यात आले. खटल्याच्या कामाकाजादरम्यान ९ साक्षीदार तपासण्यात आले. न्या. पी.पी. बनकर यांनी आकाश पाटील याला अल्पवयीन मुलीला पळवून नेल्याप्रकरणी ५ वर्षे कारावास, १० हजारांचा दंड तसेच दंड न भरल्यास २ महिने कारावास, बाल लैंगिक अत्याचारापासून संरक्षण कायद्याच्या कलम ५ (एम) / ६ नुसार दोषी धरून २० वर्षे कारावास व २० हजार रुपये दंड तसेच दंड न भरल्यास ४ महिने कारावास, धमकी दिल्याप्रकरणी १ वर्षे कारावास व दंडाच्या रकमेतून २५ हजार रुपये पीडितेला देण्याचा आदेश न्यायालयाने दिला. सरकार पक्षातर्फे विशेष सरकारी वकील अनुराधा वाणी यांनी कामकाज पाहिले. त्यांना केशवॉच सत्रे यांनी व पैरवी अधिकारी म्हणून अमोल पाटील यांनी सहकार्य केले.
