जळगाव (प्रतिनिधी) बीएचआर घोटाळ्यात न्यायालयीन कोठडीत असलेल्या ११ संशयित आरोपींपैकी ९ संशयितांनी पुणे न्यायालयात २४ जूनला जामीन अर्ज दाखल होता. त्यावर सरकारी पक्षाने आज आपले म्हणणे सादर केले. त्यानुसार आता उद्या (शुक्रवारी) जयश्री तोतला, जयश्री मणियार आणि भागवत भंगाळे या तिघांच्या जामीन अर्जावर उद्या पुन्हा सुनवाई होणार आहे. तर उर्वरित संशयितांच्या जामीन अर्जावर ५ जुलै रोजी सुनावणी होणार आहे.
बीएचआर मधील साधारण १२०० कोटीच्या घोटाळा प्रकरणात पुणे आर्थिक गुन्हे शाखेच्या पथकाने २०२० आणि २०२१ अशा दोन वेळी राज्यात छापेमारी करून बीएचआर घोटाळ्यातील संशयितांना अटक केली आहे. यातील १७ जून रोजी अटक केलेल्या ११ पैकी अंबादास बाबाजी मानकापे (औरंगाबाद),जयश्री अंतिम तोतला (मुंबई), प्रेम नारायण कोकटा, भागवत भंगाळे (जळगाव), छगन झाल्टे (जामनेर), जितेंद्र रमेश पाटील (जामनेर), जयश्री मणियार (जळगाव), संजय तोतला (जळगाव), प्रितेश चंपालाल जैन (धुळे) या ९ संशयितांनी जामिन अर्ज दाखल केले होते. तर यापैकी जयश्री तोतला आणि जयश्री मणियार या दोघांचा अंतरिम जामीन अर्ज न्यायालयाने २५ जून आधीच फेटाळून लावलेला आहे.
आज सुनावणीदरम्यान सरकार पक्षाकडून ॲडव्होकेट प्रवीण चव्हाण यांनी जोरदार युक्तिवाद करत गुन्हा गंभीर स्वरूपाचा असल्याने आरोपींना जामीन देण्यात येऊ नये, अशी मागणी केली. आता उद्या (शुक्रवारी) पुन्हा एकदा जयश्री तोतला, जयश्री मणियार आणि भागवत भंगाळे यांच्या जामीन अर्जावर सुनवाई होणार आहे. तर उर्वरित आरोपींच्या जामीन अर्जावर ५ जुलै रोजी कामकाज होणार आहे. दरम्यान, दुसरीकडे मुख्य सूत्रधार सुनील झंवरचा अनेकदा अटकपूर्व जामीन फेटाळलेला असतानाही त्याने पुन्हा एकदा पुणे न्यायालयात अटकपूर्व जामीन मिळण्यासाठी केलेला आहे. न्यायमूर्ती एस एस गोसावी यांच्या न्यायालयात जामीन अर्जावर कामकाज सुरु आहे.
(विजय वाघमारे 9284058683)
