जळगाव (प्रतिनिधी) बीएचआर घोटाळ्यात नुकतीच एक महत्वपूर्ण घडामोड घडली आहे. पोलिसांनी जप्त केलेल्या हार्डडिस्क अवसायकांच्या ताब्यात मिळाल्यामुळे नोव्हेंबरपासून ठेवीदारांना पैसे परत देण्याची प्रक्रिया सुरु होणार आहे.
या संदर्भात अधिक असे की, बीएचआर पतसंस्थेतील अपहार व फसवणूकप्रकरणी पुण्यातील डेक्कन पोलीस ठाण्यात २५ नोव्हेंबर २०२० रोजी गुन्हा दाखल झाला. त्यानंतर दुसऱ्याच दिवशी पुणे पोलिसांनी जळगावात येऊन बीएचआर पतसंस्था, अवसायक जितेंद्र कंडारे, सुनील झंवर व इतरांकडे झाडाझडती केली होती. त्यावेळी दोन ट्रक भरून कागदपत्रे, हार्डडिस्क त्याशिवाय संस्थेच्या दोन कार पोलिसांनी एमपीआयडी कायद्यान्वये जप्त केली होती. ‘हार्डडिस्कमध्येच ठेवीदार, कर्जदार, संस्थेच्या मालमत्ता यासह कंडारे, झंवर यांच्या सर्व व्यवहाराची माहिती होती. दुसरीकडे चैतन्यकुमार नासरे यांनी ८ मार्च रोजी बीएचआर पतसंस्थेच्या अवसायक पदाचा पदभार घेतला होता. परंतू दुसरीकडे डेटा नसल्यामुळे अवसायक नासरे यांना ठेवीदारांच्या ठेवी परत करण्यात अडचणी येत होत्या. परंतू आता हार्डडिक्ससह इतर संपूर्ण महत्वाचा डाटा पोलिसाकडून अवसायक नासरे यांच्या ताब्यात देण्यात आला आहे.
दोन टप्प्यातील लेखापरीक्षणानंतर नोव्हेंबरपासून पैसे परत देण्याची प्रक्रिया होणार सुरु
बीएचआर संस्थेत लेखापरीक्षक दाखल झालेले असून पहिल्या टप्प्यात २०१५-१६ या वर्षाचे लेखापरीक्षण केले जाणार आहे. त्यानंतर २०१६ ते २०२१ या कालावधीतील लेखापरीक्षण केले जाईल. साधारण ऑक्टोबरपर्यंत हे कामकाज चालणे अपेक्षित आहे. त्यानंतर नोव्हेंबर महिन्यापासून ठेवीदारांना त्यांचा पैसा परत करण्याची प्रक्रिया सुरु केली आहे. दरम्यान, बीएचआर संस्थेची हार्डडिस्क व दोन्ही वाहने पुणे पोलिसांकडून मिळाली आहेत. हार्डडिस्कमध्ये ९० टक्के डेटा मिळाला आहे. प्रत्येक ठेवीदाराला त्याच्या हक्काचे पैसे परत देण्याचा आपला प्रयत्न असल्याची प्रतिक्रिया अवसायक नासरे यांनी माधामांशी बोलतांना दिली आहे.
