बीएचआर घोटाळा : मुख्य शाखेच्या सर्व्हरमधून कंडारे आणि शहाने डेटा डिलीट केल्याचा पोलिसांना संशय !

जळगाव (प्रतिनिधी) भाईचंद हिराचंद रायसोनी (Bhr) या पतसंस्थेच्या मुख्य शाखेतील २ हजार टीबीच्या डाटाबेस सर्व्हरमधील (Database Server) तब्बल २६ महत्वपूर्ण शाखांचा डेटा मुख्य संशयित आरोपी तत्कालीन अवसायक जितेंद्र कंडारे व तांत्रिक कामकाज बघारा कुणाल शहा यांनी डिलीट केल्याचा पोलिसांना संशय आहे. यामुळेच ठेवीदारांना पैसे परत करण्याची प्रक्रिया गती घेत नाहीय. (bhr scam)

२ हजार टीबीच्या सर्व्हरमधून तब्बल २६ शाखांचा डेटा गायब
गैरव्यवहाराचे पुणेपोलिसांच्या आर्थिक गुन्हे शाखेने तब्बल एक ट्रक भरुन पुरावे गोळा केले होते. त्यात मुख्य शाखेतील २ हजार टीबीच्या सर्व्हरचा समावेश होता. बीएचआर घोटाळ्यात जळगावमधील वेगवेगळ्या १२ ठिकाणी टाकलेल्या धाडीत आर्थिक गुन्हे शाखेला मिळालेली कागदपत्रे, शपथपत्रे, तसेच लॅपटॉप, पीसीओसह मोठ्या प्रमाणावर डिजिटल साहित्यही हस्तगत करण्यात आले होते. आर्थिक गुन्हे शाखेने तब्बल एक ट्रक भरुन पुरावे गोळा केले होते. याबरोबरच औरंगाबाद व अन्य ठिकाणी केलेल्या तपासणीतही अनेक महत्वपूर्ण कागदपत्रे पोलिसांच्या हाती लागली होती. परंतू मुख्य शाखेतील २ हजार टीबीच्या सर्व्हरमधून एक-दोन नव्हे तर २६ शाखांचा डेटा आढळून आला नाही. त्यामुळे हा डेटा मुख्य संशयित आरोपी तत्कालीन अवसायक जितेंद्र कंडारे व तांत्रिक कामकाज बघारा कुणाल शहा यांनी डिलीट केल्याचा पोलिसांना संशय आहे. कुणाल शहावर ‘बीएचआर’ची अधिकृत वेबसाईट असतांना बनावट सॉफ्टवेअर तसेच वेबसाईट तयार करून दिल्याचा आरोप आहे. आर्थिक गुन्हे शाखेच्या पथकाने हा डेटा रिकव्हर अर्थात परत मिळविण्यासाठी फोरेन्सिग लॅबकडे सर्व्हर पाठवलेले आहे. फोरेन्सिग लॅब हा डेटा हळू-हळू रिकव्हर करत आहे.

कुणाल शहाने तयार केले होते बनावट सॉफ्टवेअर आणि वेबसाईट
पुणे आर्थिक गुन्हे शाखेच्या तपासात असे निष्पन्न झालेय की, बीएचआर संस्थेच्या मालमत्ता विक्रीसाठी २ अधिकृत वेबसाईट अस्तीत्वात असताना आरोपींतांनी बनावट खाजगी वेबसाईट कुणालाही कळू नये म्हणून अहमदाबादच्या कुणाल शहा या व्यक्तीकडून संगणमताने तयार केली होती. या बनावट वेबसाईटव्दारे सदर संस्थेच्या मालमत्ता विक्री केल्याचा खोटा देखावा निर्माण करून संस्थेच्या करोडो रूपयांच्या मालमत्तेचा विक्रीच्या नावाखाली अपहार केला होता. तर दुसरीकडे आतापर्यंत झालेल्या फॉरेन्सिक ऑडिटमध्ये अंदाजे ६५० कर्जखाती एफ.डी. मॅचिंगद्वारे निरंक केल्याचे निष्पन्न झाले आहे. परंतु यापैकी बऱ्याच कर्जदारांच्या कर्ज मागणी अर्ज फाईल व एफ.डी. मॅचिंग झालेल्या फाईल्स कार्यालय झडतीमध्ये मिळुन आलेल्या नाहीत. या सर्व फाईल्स पुराव्याच्या दृष्टीने अत्यंत महत्वाच्या असून त्या कोठे दडवुन ठेवल्या आहेत, याबाबत कंडारेकडे सखोल चौकशी करण्यात आली होती.

सर्व्हर/हार्डडिस्क जप्त

कंडारेकडून टेंडर प्रक्रिया राबविण्यासाठी बनविण्यात आलेल्या वेबसाईटचा प्रोग्रॅम कोड व सोर्स कोड जाणुन घेवुन सदर वेबसाईटचा डेटा कोणत्या सर्व्हर / हार्डडिस्कवर सेव्ह केलेला आहे?, याबाबत तपास करुन सदरचा सर्व्हर/हार्डडिस्क जप्त करण्यात आल्या होत्या. सदरची वेबसाईट कोण कोणत्या ठिकाणी लिंक केलेली आहे?. या वेबसाईटला अन्य काही पेमेंट गेट वे आहेत का? व त्याद्वारे पतसंस्थेच्या पैशांचा अपहार झाला आहे का? याबाबतही कंडारेची कसून चौकशी झाली होती. दरम्यान, कंडारे हा फरार असताना त्याने पतसंस्थेतील अधिक दस्तऐवज, हार्डडिस्क वगैरे पुरावा अन्यत्र कोणाकडे लपवून ठेवला असण्याचा किंवा नष्ट केला असण्याची दाट शक्यता पोलिसांनी आधीच व्यक्त केली होती. दरम्यान, आता कंडारे शिक्रापूरच्या गुन्ह्यात कारागृहात आहे. तर कुणाल शहाला न्यायालयाने अटकेपासून संरक्षण दिलेले आहे.

…म्हणून पुणे आर्थिक गुन्हे शाखा फोरेसिंग लॅबच्या सतत संपर्कात !
आर्थिक गुन्हे शाखेने जप्त केलेल्या अनेक ‘हार्डडिस्कसमध्येच ठेवीदार, कर्जदार, संस्थेच्या मालमत्ता यासह कंडारे, झंवर यांच्या सर्व व्यवहाराची माहिती होती. चैतन्यकुमार नासरे यांनी बीएचआर पतसंस्थेच्या अवसायक पदाचा पदभार घेतल्यानंतर त्यांना ठेवीदारांच्या ठेवी परत करण्यात अडचणी येत होत्या. परंतू आता हार्डडिक्ससह इतर संपूर्ण महत्वाचा डाटा पोलिसाकडून अवसायक नासरे यांच्या ताब्यात देण्यात आलेला आहे. त्यामुळे ठेवीदारांना पैसे परत मिळण्याचा मार्ग मोकळा झाला होता. परंतू सर्व्हरमधील डेटा पूर्ण मिळत नाही, तोपर्यंत विद्यमान अवसायक चैतन्यकुमार नासरे यांच्यासमोर अडचणी कायम राहणार आहेत. त्यामुळे पुणे आर्थिक गुन्हे शाखेकडून डेटा लवकरात लवकर मिळावा म्हणून फोरेसिंग लॅब सतत संपर्क सुरु आहे.