भुसावळ (प्रतिनिधी) रेल्वेत मोठे अधिकारी व रेल्वे मंत्र्यांशी ओळख असल्याचे बतावणी करून रेल्वे खात्यात टीसीची नोकरी देण्याचे आमिष दाखवत दोन भांवाची ३० लाखांची फसवणूक केल्याचा धक्कादायक प्रकार समोर आला आहे. या प्रकरणी २० मार्चला दुपारी ४.३० वाजता भुसावळ शहर पोलीस ठाण्यात एकाविरुद्ध फसवणुकीचा गुन्हा दाखल करण्यात आला आहे.
शहरातील रेल्वे नार्थ कॉलनीत राहणारा महेंद्र प्रकाश संसारे (वय ४०) हा तरूण आपल्या कुटुंबासह वास्तव्याला आहे. दरम्यान, भुसावळातील शांतीनगरमधील संशयित सागर शिवदास वानखेडा याने रेल्वेतील मोठे अधिकारी व रेल्वे मंत्री यांच्याशी ओळख असल्याचे सांगितले. तर महेंद्र संसारे व त्यांचा भाऊ सचिन संसारे यांना रेल्वेत टीसी पदावर नोकरीला लावून देण्याचे आमिष दाखवले. त्यासाठी २ मे २०१७ ते डिसेंबर २०२३ दरम्यान वेळोवळी ३० लाख रूपये या दोन्ही भावांकडून घेतले.
अनेक दिवस होऊनही या दोन्ही भावांना रेल्वेत नोकरी लावून दिली नाही. दरम्यान, आपली फसवणूक झाल्याचे लक्षात आल्यानंतर महेंद्र संसारे यांनी २० मार्च रोजी दुपारी ४.३० वाजता भुसावळ शहर पोलीस ठाण्यात धाव घेवून तक्रार दिली. त्यानुसार संशयित सागर शिवदास वानखेडा याच्याविरोधात भुसावळ शहर पोलीस ठाण्यात गुन्हा दाखल करण्यात आला आहे. तपास पोलीस उपनिरीक्षक विजय गायकवाड करत आहेत.
