धरणगाव (प्रतिनिधी) डिझेल टंचाई निर्माण झाल्यामुळे शहरासह परिसरातील बहुतांश पेट्रोल पंपांवर डिझेलचा ठणठणाट होता. त्यामुळे चारचाकी वाहनधारकांना मोठा फटका बसत आहे.
विशेष करून शेतीकामाची सध्या लगबग असून ट्रॅक्टरद्वारे शेतीची मशागत केली जात आहे. पंपांवर डिझेलच नसल्याने ही वाहने जागेवरच थांबून आहेत. केंद्र सरकारने नुकताच इंधनावरील उत्पादन शुल्कात कपात केली आहे. मात्र या इंधन कपातीचा गोंधळ आवरत नाही; तोच भारत पेट्रोलियम कार्पोरेशन लिमीटेडचा पेट्रोल पंपांवर डिझेलचा मोठ्या प्रमाणावर तुटवडा जाणवत असल्याने एचपीसीएलचे पंपधारक हैराण झाले आहेत. धरणगाव परिसरात गेल्या चार– पाच दिवसांपासून अशी समस्या निर्माण झाली आहे. या डिझेल तुटवड्याचा फटका ग्राहकांना बसत आहे.
डिझेलसाठी अगावू पैसे देवूनही टँकर लवकर मिळत नाही. त्यामुळे पंप बंद ठेवण्याची वेळ पंपचालकांवर आली आहे. धरणगाव शहर व परिसरात भारत पेट्रोलियम कार्पोरेशन लिमीटेड, हिंदुस्थान पेट्रोलियम कार्पोरेशन लिमीटेड, यांचे पंप आहेत. मात्र गेल्या पाच सहा दिवसांपासून विशेषकरून एचपीसीएलच्या कंपनीद्वारे इंधन पुरवठ्यात अनियमीतता दिसून येत आहे. मनमाड येथील पानेवाडी डेपोवरून खान्देशातील एचपीसीएलच्या पंपधारकांना पेट्रोल व डिझेल मिळते. मात्र यात गेल्या चार पाच दिवसापासून नियमीततेचा अभाव आहे. परिणामत: गावासह सह हाय-वे वरील देखील डिझेल अभावी पेट्रोलपंप चालकांना पंप बंद ठेवावे लागत आहेत. त्याचा फटका पंप धारकांसह चारचाकी वाहन धारक तसेच व्यावसायीक वाहनधारकांना देखील बसत आहे.
