बोदवड (प्रतिनिधी) तालुक्यातील हंरणखेड येथे अवैध दारूमुळे झालेल्या भांडणात झालेल्या हाणामारीत एक गंभीर जखमी झाल्यानंतर महिला पोलीस ठाण्यात धडकल्यामुळे वातावरण गंभीर झाले होते.
दि. 27 ऑगस्ट रोजी शनिवारी सकाळी साडेदहा वाजेच्या सुमारास एकाने दुसऱ्यास शिवीगाळ करत काठीने डोक्यावर हात पायावर बेदम मारहाण करत गंभीर जखमी केले होते. जखमीस पुढील उपचारासाठी जळगाव येथे रुग्णालयात दाखल करावे लागले होते. या प्रकरणी बोदवड पोलीस ठाण्यात 28 रोजी दुपारी 4:30 वाजेच्या सुमारास जखमी नारायण सुखदेव तायडे याची बहीण सिंधुबाई पांडुरंग तायडे यांच्या फिर्यादीवरून भिमराव रामदास तायडे (रा. हंरणखेड) याच्याविरोधात भादवि 326,506, प्रमाणे गुन्हा नोंद करण्यात आला आहे.
दरम्यान सदर घटनेस गावात विकली जाणारी अवैध दारू कारणीभूत आहे, असं मत गावातील महिलांनी व्यक्त केले असून सहज उपलब्ध होणाऱ्या दारूमुळे गावात नेहमी वाद मारामारी होतात. हंरणखेड गावात एका आठवड्यात तीन मारामारीच्या घटना झाल्या असून नुकताच जो प्रकार घडला, तो दारूमुळे झालाय. यामुळे महिलांनी पोलिसांना निवेदन दिले. यावेळी पोलीस निरीक्षक राजेंद्र गुंजाळ यांनी निवेदन स्वीकारले. निवेदन देतांना उषा तायडे ,कुसुम तायडे ,अनिता तायडे ,विमल वाघ ,बेबा गवळी ,कमला गवळी,दुर्गा तायडे ,वच्छला तायडे ,सुशीला तायडे ,उषा गवळी ,उज्वला गवळी ,लता गवळी, आशा गवळी, शारदा तायडे, सिंधू मेढे, चंद्रा तायडे, बबिता मेढे, सुरेखा इंगळे, अनुसया गवळी, शिला तायडे, शोभा गवळी, रत्ना इंगळे, मनकर्णा तायडे, सुमन गवळीसह आदी महिला उपस्थित होत्या.
