बोदवड (प्रतिनिधी) तालुक्यातील शेलवड ग्राम पंचायत मध्ये १४व्या आणि १५ व्या वित्त आयोगाच्या निधीत वेळोवेळी अपहार केल्याच्या आरोपाखाली माजी प्रभारी सरपंच निलेश माळी याला अटक करण्यात पोलिसांना अखेर यश आले आहे. दरम्यान, माळी याला कोर्टात हजर केले असता त्याला तीन दिवसाची पोलीस कोठडी मिळाली असल्याची माहिती पोलीस सूत्रांनी दिली आहे.
लाखो रुपयांचा भ्रष्टाचार झाल्याची तक्रार
याबाबत सविस्तर माहिती अशी की, बोदवड तालुक्यातील शेलवड, मुक्तळ, विचवा, सुरवाडे बु. ग्राम पंचायतीमध्ये ३० डिसेंबर २०१८ ते १७ फेब्रुवारी २०२१ दरम्यान लाखो रुपयांचा भ्रष्टाचार झाल्याची बाब उघड झाली होती. याप्रकरणी पंचायत समितीचे विस्तार अधिकारी (ग्रा.पं.) रमेश भास्कर सपकाळे यांनी पोलिसात दिलेल्या फिर्याद नुसार या ग्रामपंचायतीतचे तत्कालीन ग्रामसेवक संदीप चंद्रभान निकम आणि शेलवड ग्रामपंचायतचे तत्कालीन प्रभारी सरपंच निलेश शांताराम माळी यांच्या विरोधात बोदवड पोलिसात गुन्हा रजिस्टर क्र. ७२/२०२२ भादंवी कलम ४२०,४१९, ४६७, ४६८, ४६९, ४७१ प्रमाणे दि. २२ मे २०२२ रोजी गुन्ह्याची नोंद झाली होती.
मध्यरात्री घरी येताच केली सापळा रचून अटक
५२ लाख ९४ हजार १८० चा भ्रष्टाचार या दोघा संशयितांनीवर उल्लेखित कालावधीत लाखो रुपयांचा भ्रष्टाचार केल्याने त्याचा तपास आर्थिक गुन्हे शाखा जळगावकडे वर्ग करण्यात आला होता. संशयित ग्रामसेवक निकम यांनी उच्च न्यायालयातून अंतरिम जामीन मिळविल्याचे समजते. तर संशयित निलेश माळी यांनी सुद्धा अटकपूर्व जामिनासाठी प्रयत्न केल्याचे समजते. दरम्यान, फरार असलेला संशयित निलेश माळी हा रात्रीच्या वेळी घरी येत असल्याची माहिती बोदवड पोलिसांना मिळाली होती. त्यामुळे पोलिसांनी पाळत ठेवून १२ तारखेस मध्यरात्री माळी यास अटक केली.
यांच्या पथकाने केली कारवाई !
पोलीस अधिक्षक डॉ. प्रविण मुंडे यांचे मार्गदर्शनाखाली बोदवड पो. स्टे. चे पो. नि. राजेंद्र गुंजाळ, सपोनि अंकुश जाधव, पो.ना. संदीप झरवाल, पो.काॅ.भगवान पाटील, पो.काॅ.निलेश शिसोदे, पो.काॅ.मुकेश पाटील, पो.काॅ.दिपक पाटील, म .पो.कॉ.रुपाली डांगे तसेच तपासी अधिकारी, आर्थिक गुंन्हे शाखा जळगाव, पो. उप निरीक्षक महेश घायतड, स.फौ.जगताप, स.फौजदार पठाण, पो.काॅ.नितीन सपकाळ यांनी ही कामगिरी पार पाडली .निलेश माळी यांस अटक करून आज बोदवड येथील न्यायालयात हजर करण्यात आले. न्यायालयाने त्यांस तीन दिवसांची पोलीस कोठडी सुनावली असून पुढील तपास आर्थिक गुन्हे शाखेचे पो.उप निरीक्षक महेश घायतड हे करीत आहेत.
