बोदवड (प्रतिनिधी) शहरातील बोदवड अग्रसेन ज्वेलर्स हे दुकान मंगळवारी रात्री अज्ञात चोरट्यांकडून फोडण्याचा अयशस्वी प्रयत्न झाल्याची घटना उघडकीस आली आहे. विशेष म्हणजे यावेळी कर्तव्यावर असलेले वॉचमन सोनू गायकवाड यांनी चोरट्यांचा प्रयत्न हाणून पाडला.
चोरट्यांनी चोरीची मारुती इको वाहनाला गावातीलच एका दुसऱ्या वाहनाची नंबर प्लेट चोरून ती लावत चोरी करण्याचा प्रयत्न केला. डॉक्टर बाबासाहेब आंबेडकर चौक परिसरातील गुप्ता कॉम्प्लेक्समधील अग्रसेन ज्वेलर्स या ठिकाणी पाच चोरटे आले व त्यांनी दुकान फोडण्याचा प्रयत्न केला. परंतू व्यापारी संकुलात कार्यरत असलेले वॉचमन सोनू गायकवाड यांना चाहूल लागल्याने त्यांनी लागलीच प्रतिकार सुरू केला. यामुळे चोरट्यांनी त्यांच्यावर टॉमी सदृश्य वस्तूने हल्ला करण्याचा प्रयत्न केला. परंतु सोनू गायकवाड यांनी त्यास प्रत्युत्तर देत चोरट्यांचा चोरीचा उद्देश हाणून पाडला. वॉचमन सोनू गायकवाड हे आक्रमक असल्याचे बघून चोट्यांना तिथून पळ काढावा लागला.
याच पार्श्वभूमीवर आज बोदवड पोलीस स्टेशन येथे पोलीस निरीक्षक राजेंद्र गुंजाळ यांच्या मार्गदर्शनात ‘एक कॅमेरा पोलिसांसाठी’, या विषयावर तात्काळ व्यापारी बंधूंची बैठक घेत सर्वांना कॅमेरे लावणे बाबत आवाहन करण्यात आले. तसेच चोरीचा प्रयत्न हाणून पाडणाऱ्या वॉचमन सोनू गायकवाड याचा सत्कार करण्यात आला. ही चोरीची मारुती इको गाडी जळगाव येथून चोरली असल्याचा संशय आहे.
