जळगाव (प्रतिनिधी) संपूर्ण राज्याला हादरवून सोडणाऱ्या बीएचआर घोटाळ्याचा तपास आता सीआयडीकडे वर्ग करण्यात आला आहे. आज सकाळी याबाबतचे आदेश पुणे पोलिसांना मिळाल्याचे कळतेय.
भाईचद हिराचंद रायसोनी मल्टिस्टेट को-ऑपरेटिव्ह पतसंस्थेच्या पुण्यातील घोले रोड शाखेने बेनामी खात्यांद्वारे १६०७ कोटींचे बेहिशेबी व्यवहार केल्याचे उघडकीस आल्यानंतर अवघ्या पाच दिवसांतच ठेवीदारांनी २०० कोटी रुपये विविध शाखांतून काढले होते. २०१४ मध्ये बीएचआरला लागलेले ग्रहण आजही कायम आहे. अगदी स्विस बँकेप्रमाणे बीएचआरमध्ये देखील कोंट्यावधीच्या बेनामी ठेवी ठेवलेल्या होत्या. त्यामुळे तेव्हापासून देशभरात बीएचआर घोटाळा चांगला गाजला होता.
बीएचआर घोटाळ्यातील मुख्य संशयित सुनील झंवरने हायकोर्टात जामिनासाठी अर्ज केला होता. त्यानुसार त्याला फेब्रुवारी २०२२ मध्ये जामीन मंजूर झाला होता. तर झंवर याचा मुलगा सुरज झंवर याने अनेक महिने पोलीस कोठडीत काढले होते. त्याला पुणे आर्थिक गुन्हे शाखेच्या पथकाने २२ जानेवारीला सायंकाळी अटक केली होती. त्यानंतर सुरजला मे २०२१ ला जामीन मंजूर झाला होता. तर दुसरीकडे बीएचआर घोटाळ्यातील मुख्य संशयित तथा अवसायक जितेंद्र कंडारेला पुणे आर्थिक गुन्हे शाखेच्या पथकाने इंदोरमधून अटक केली होती. त्यानंतर जामीन मंजूर झाल्याबरोबर त्याला शिक्रापूरच्या गुन्ह्यात ताब्यात घेण्यात आले होते. एवढेच नव्हे तर या गुन्ह्यात पुणे आर्थिक गुन्हे शाखेने 17 जून २०२१ रोजी जळगाव जिल्ह्यातील भागवत भंगाळे, प्रेम नारायण कोगटा, संजय तोतला तिन्ही रा. जळगाव, जयश्री शैलेश मणीयार रा. पाळधी, जयश्री अंतिम तोतला रा. मुंबई, जितेंद्र रमेश पाटील रा. जामनेर, आसिफ मुन्ना तेली रा. भुसावळ, छगन शामराव झाल्टे रा. जामनेर, राजेश शांतीलाल लोढा रा. तळेगाव ता. जामनेर, यांच्यासह प्रितेश चंपालाल जैन रा. धुळे, अंबादास आबाजी मानकापे रा. औरंगाबाद या 11 जणांना अटक केली होती. दरम्यान, बीएचआर घोटाळ्याचा तपास सीआयडीकडे वर्ग करण्यात आला आल्याच्या वृत्ताला पोलीस सूत्रांनी दुजोरा दिला आहे. राज्य सरकारच्या आदेशाने संबंधित गुन्ह्याचा तपास आर्थिक गुन्हे शाखेकडून सीआयडी दिल्याचे पत्र पुणे सीपींंना आज सकाळी मिळाल्याचे कळतेय.
