नवी दिल्ली (वृत्तसंस्था) बुली बाई (Bulli Bai) नावाने गिटहब (GitHub) नावाच्या अॅपवर काही मुस्लीम महिलांचे आक्षेपार्ह फोटो अपलोड केल्याची धक्कादायक घटना समोर आली आहे. संबंधित अॅपवर देशातील काही प्रसिद्ध आणि नामांकित महिलांचे आक्षेपार्ह फोटो अपलोड करण्यात आले आहेत. एवढेच नव्हे तर संबंधित फोटोंवर अश्लील मजकूर लिहिला जात आहे. शिवाय काहीजणांकडून या फोटोंचा सौदा केला जात आहे. यामध्ये एका महिला पत्रकाराचा देखील समावेश आहे. राहुल गांधी यांनी विरोधात ट्वीट करत सर्वांनी एकसुरात आवाज उठविण्याचे आवाहन केले आहे.
शनिवार, १ जानेवारी २०२२ रोजी बुली बाई नावाने अॅपवर फोटो अपलोड करण्यात आले आहेत. या प्रकरणाची माहिती मिळताच दिल्ली पोलिसांच्या अधिकाऱ्यांनी या प्रकरणाची दखल घेत संबंधित अधिकाऱ्यांना कारवाई करण्यास सांगितलं आहे. या अॅपवर मुस्लिम महिलांचे फोटो अपलोड करण्यात आले असून, त्याबरोबर आक्षेपार्ह मजकूर टाकण्यात आला आहे. इतकंच नाही तर त्या फोटोंचा लिलाव केला जात आहे. यात एका महिला पत्रकाराचा फोटो अपलोड करण्यात आला असून आक्षेपार्ह मजकूरासह तो शेअर केला जात आहे.
मला आणि इतर तत्सम स्वतंत्र महिला आणि पत्रकारांना त्रास देण्यासाठी हे डिझाइन केलेलं
“आज सकाळी मला हे कळल्यावर धक्का बसला की bullibai.github.io नावाच्या वेबसाइट/पोर्टलवर (हटवल्यापासून) अयोग्य, अस्वीकार्य आणि स्पष्टपणे अश्लील संदर्भात माझे छेडछाड केलेले चित्र आहे. याबाबत त्वरित कारवाई करणे आवश्यक आहे. मला आणि इतर तत्सम स्वतंत्र महिला आणि पत्रकारांना त्रास देण्यासाठी हे डिझाइन केलेलं आहे,” अशी तक्रार त्या महिला पत्रकाराने केली आहे.
प्रकरणाचा तीव्र पडसाद
या प्रकरणाचे तीव्र पडसाद आता उमटू लागले आहेत. शिवसेना खासदार प्रियंका चतुर्वेदी यांनी हा मुद्दा उपस्थित केला आहे. होस्टिंग प्लॅटफॉर्म गिटहब वापरून शेकडो मुस्लिम महिलांचे फोटो अॅपवर अपलोड केले असल्याचं प्रियंका चतुर्वेदी यांनी म्हटलं आहे. मुंबई पोलिसांकडे याप्रकरणाची तक्रार करण्यात आली असून, दोषींना लवकरात लवकर अटक करण्याची मागणी प्रियंका चतुर्वेदी यांनी केली आहे. यासंदर्भात प्रियंका चतुर्वेदी यांनी ट्विट केलं आहे, त्यात त्यांनी लिहिलं आहे. ‘मी मुंबईचे पोलीस आयुक्त आणि पोलीस उपायुक्त (गुन्हे) रश्मी करंदीकर यांच्याशी यासंदर्भात चर्चा केली आहे. तसंच महाराष्ट्राच्या पोलीस महासंचलाकांनाही मध्यस्थी करण्याची विनंती केली आहे. चुकीच्या सेक्सिस्ट साईटमागे जे आहेत ते लवकरच पकडले जातील.
मुंबई सायबर पोलिसांनी सुरु केला तपास
मुंबई पोलिसांनी या याप्रकरणीच गंभीर दखल घेतली असून संबंधित अधिकाऱ्यांना कारवाई करण्याचे आदेश दिले आहेत. मुंबई सायबर पोलिसांनी या प्रकरणाची चौकशी सुरु केली आहे. या अॅपमध्ये नाव असलेल्या एका मुस्लीम महिला पत्रकाराने सांगितलं की मुस्लिम महिलांसाठी नवीन वर्षाची सुरुवात भीती आणि द्वेषाच्या भावनांनी झाली आहे. गेल्या वर्षी ‘सुल्ली डील्स’ चा वाद झाला होता. यातही मुस्लीम महिलांच्या फोटोचा गैरवापर करण्यात आला होता. पण दोषींविरोधात कोणतीही ठोस कारवाई करण्यात आली नव्हती.
तेंव्हाच महिलांचा अपमान आणि धार्मिक द्वेष बंद होईल – राहुल गांधी
काँग्रेस नेते राहुल गांधी यांनी आज रविवारी मुस्लीम महिलांच्या ‘लिलाव’ करणाऱ्या एका ऍप्लिकेशन विरोधात ट्विट करत आवाज उठवण्याचं आवाहन केलं आहे. महिलांचा अपमान आणि धार्मिक द्वेष तेंव्हाच बंद होईल जेंव्हा आपण सगळे एकासुरात आवाज उठवत याविरोधात ठामपणे उभे राहू. वर्ष बदललं आहे, अवस्थाही बदलू. आता बोलायलाच हवं. असं त्यांनी ट्विट केलंय. पुढे #NoFear असं देखील त्यांनी म्हटलंय.
अॅप ब्लॉक केले गेले आहे – आयटी मंत्री अश्विनी वैष्णव
आयटी मंत्री अश्विनी वैष्णव यांनी सांगितलंय की, हे अॅप ब्लॉक केले गेले आहे आणि पुढील कारवाई केली जात आहे. “GitHub ने आज सकाळीच वापरकर्त्याला ब्लॉक केल्याचं सांगितलं आहे. CERT आणि पोलीस अधिकारी पुढील कारवाईबाबत प्रयत्नशील आहेत.
