जळगाव (प्रतिनिधी) – काही दिवसांपुर्वी पोलीस ठाण्यातच दोन गटात तुफान हाणामारी झाल्याची घटना घडली होती. त्यानंतर आता त्याच शनिपेठ पोलीस ठाण्यातील अंमलदाराला एक लाख रुपयांची लाच घेतांना रंगेहाथ पकडले. वारंवार घडणाऱ्या या घटनांमुळे पोलिसांची प्रतिमा मलीन झाल्यामुळे खाकी डागाळली आहे. तसेच आतापर्यंत अहिरे यांनी केलेल्या अर्ज चौकशींमध्ये त्यांनी लाच घेतल्याचा लाचलुचपत प्रतिबंधक विभागाला संशय असल्याने त्या दृष्टीने चौकशी केली जात आहे.
शनिपेठ पोलीस ठाण्यात दाखल केलेल्या तक्रारी अर्जानुसार कायदेशीर कारवाई न करता, तो अर्ज निर्गती करण्याच्या मोबदल्यात अर्ज चौकशी करणाऱ्या पोलीस नाईक विनोद अहिरे यांनी तक्रार असलेल्या मुलाच्या वडीलांकडे एक लाख रुपयांची लाच मागितली होती. त्यानंतर पोलीस ठाण्यातच अहिरे यांना लाच घेतांना लाचलुचपत प्रतिबंधक विभागाच्या पथकाने दि. १३ एप्रिल रोजी रंगेहाथ पकडले होती. पोलीस ठाण्यातच लाच स्विकारल्यामुळे जिल्हा पोलीस दलात एकचख खळबळ उडाली होती.
हाणामारीनंतर लाचखोरीमुळे प्रतिमा मलीन
ठेकेच्या वादातून माजी नगरसेवक कैलास सोनवणे व शिंदे गटाचे समर्थक राहुल उर्फ मोगली ठाकरे यांच्यात वाद होऊन दोन्ही गटाकडून लाठ्याकाठ्यांसह तलवारीने एकमेकांना मारहाण करण्यात आली होती. त्यानंतर शनिपेठ पोलिस ठाण्यात तक्रार दाखल करीत असताना दोन्ही गट भिडल्याची घटना दि. १४ एप्रिल रोजी घडली होती. य घटनेला महिनाभराचा कालावधी उलटत नाहि तोच १ लाखांची लाच स्विकारतांना पोलीस अंमलदाराला रंगेहाथ पकडल्यामुळे खाकीच प्रतिमा मलीन झाली आहे.
