जळगाव प्रतिनिधी : कासोदा येथील समाजसेवक मधुकर ठाकूर यांचा २३ मार्च रोजी बांभोरी खुर्द जवळ अज्ञात वाहनाने धडक दिल्याने गंभीर अपघात झाला. त्यांना बेशुद्ध अवस्थेत जळगाव येथील खाजगी रुग्णालयात दाखल करण्यात आले.
तपासणीनंतर त्यांच्या डोक्याला मार लागल्याचे तसेच उजव्या खांद्याचे हाड मोडल्याचे स्पष्ट झाले. उपचार दोन टप्प्यात करावे लागणार होते. डॉक्टरांनी प्रथम डोक्याच्या जखमेवर उपचार सुरू केले.
मात्र उपचार सुरू करण्यापूर्वी मोठी रक्कम जमा करण्याची अट रुग्णालयाने घातली. ठाकूर यांची आर्थिक परिस्थिती सामान्य असल्याने कुटुंबीयांनी नातेवाईकांकडून पैसे जमवून उपचार सुरू ठेवले. दररोजचा औषध व रुग्णालयाचा खर्च वाढत गेला.
शासनाच्या आरोग्य योजनांचा लाभ मिळेल अशी अपेक्षा असतानाही खाजगी रुग्णालयाकडून खर्च वसूल करण्यात आल्याची माहिती ठाकूर यांच्या मुलाने दिली. एका ठिकाणी खाट उपलब्ध नसल्याचे सांगण्यात आले, तर दुसऱ्या रुग्णालयात योजना लागू नसल्याचे कारण देण्यात आले.
मेंदूवरील उपचारासाठी सुमारे ७० हजार रुपये योजनेतून मिळाल्याचे सांगण्यात आले, मात्र एकूण बिल सुमारे १ लाख ४० हजार रुपये करण्यात आल्याचे कुटुंबीयांचे म्हणणे आहे.
गरजू रुग्णांना शासनाच्या योजनांचा प्रत्यक्ष लाभ मिळावा आणि अशा प्रकारे आर्थिक अडचणी निर्माण होऊ नयेत, यासाठी संबंधित प्रशासनाने लक्ष देण्याची मागणी होत आहे.
