जळगाव (प्रतिनिधी) – अवैध धंद्यांचे समूळ उच्चाटण करण्यासाठी पोलिस दलातर्फे विशेष मोहीम राबविण्यात आली. या मोहीमेत हातभट्टी दारू, सट्टा, जुगार, अवैध दारुविरुद्ध कठोर कारवाई करण्यात आली असून एकूण १९१ जणांविरुद्ध गुन्हे दाखल करण्यात आले. तसेच ३ लाख ४३ हजार २५२ रुपयांचा मुद्देमाल जप्त करण्यात आला. तर २४ लाख ६७ हजार ४८५ रुपये किमतीची हातभट्टीची दारू व इतर साहित्य नष्ट करण्यात आली.
जिल्हा पोलिस अधीक्षक श्रीकांत धिवरे यांच्या मार्गदर्शनाखाली जिल्ह्यातील सर्व पोलिस ठाण्यांच्या हद्दीत विविध ठिकाणी छापे टाकून दि. १० मे कारवाईची मोहीम राबविण्यात आली होती. ८५ कारवायांमध्ये २४ लाख ६७
हजार ४८५ रुपयांची हातभट्टीची दारू व इतर साहित्य नष्ट करण्यात आले. यात ८३ जणांविरुद्ध गुन्हे दाखल करण्यात आले. या सोबतच सट्टा, जुगारांवर ५८ कारवाया करण्यात आल्या. त्यात २ लाख २ हजार १९२ रुपये किमतीचा मुद्देमाल जप्त करून ६९ जणांविरुद्ध गुन्हे दाखल करण्यात आले. ही कारवाई पोलिस अधीक्षक श्रीकांत धिवरे यांच्या मार्गदर्शनाखाली अप्पर पोलिस अधीक्षक संदीप गावित (जळगाव), कविता नेरकर (चाळीसगाव) तसेच उपविभागीय पोलिस अधिकारी, सर्व पोलिस ठाण्याचे प्रभारी व कर्मचाऱ्यांनी केली.
दारुची वाहतुक करणाऱ्यांवर गुन्हे दाखल
अवैध दारु बाळगणे, उघड्यावर दारू पिणे व वाहतूक करणे अशा दारूबंदी कायद्याचे उल्लंघन करणाऱ्या ३८ कारवाया करण्यात येऊन ३९ जणांविरुद्ध गुन्हे दाखल करण्यात आले. यात एकूण १ लाख ४१ हजार ६० रुपये किमतीचा मुद्देमाल जप्त करण्यात आला.
