जळगाव (प्रतिनिधी) हॉस्पिटलमध्ये ड्यूटीवर गेलेल्या परिचारिकेच्या घराचा कडीकोयंडा तोडून चोरट्यांनी घरात प्रवेश केला. बेडरुमधील लोखंडी कपाटातील सामान अस्तव्यस्त फेकला. मात्र चोऱ्यांना काहीच मिळून आले नाही. त्यानंतर चोरट्यांनी किचन ओट्याखाली ठेवलेल्या गोणीतील भांडे उपसून त्यामध्ये कापडात गुंडाळून ठेवलेले पावणे तीन लाख रुपयांचे साडेसहा तोळे सोने चोरुन नेले. ही घटना गुरुवारी सकाळी भोईटेनगरात उघडकीस आली. याप्रकरणी शहर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
कडीकोयंडा तोडून आत केला प्रवेश !
शहरातील भोईटे नगरातील गुरुपार्क येथे अनिता रमेश दप्तरी (वय ७३) या वृद्ध महिला वास्तव्यास आहे. त्यांच्या पतीचे दोन वर्षापूर्वी निधन झाले असून दोन मुली विवाहित आहेत. मोठी मुलगी नाशिक तर लहान मुलगी भुसावळ येथे वास्तव्यास आहेत. त्यामुळे अनिता दप्तरी या एकट्याच राहतात. त्या शहरात एका खाजगी हॉस्पिटलमध्ये परिचारिका म्हणून नोकरी करीत होत्या. नेहमीप्रमाणे बुधवार दि. ४ सप्टेंबर रोजी त्या घराच्या दरवाजाला कुलूप लावून ड्युटीवर निघून गेल्या. मध्यरात्रीच्या सुमारास चोरट्यांनी कुलूप बंद असलेल्या घराचा कडीकोयंडा तोडून आत प्रवेश केला.
भांडे भरुन ठेवलेल्या गोणीतून दागिने लागले हाती !
चोरट्यांना कपाटात काही मिळून न आल्याने त्यांनी किचनमधील साहित्याची शोधाशोध केली. यावेळी त्यांना किचन ओट्याच्या खाली सिलेंडरच्या बाजुला भांडे भरुन ठेवलेली गोणी होती. ही गोणी सोडून चोरट्यांनी त्यातील सामान बाहेर काढला. या गोणीत फडक्यामध्ये बांधलेले दागिने चोरट्यांचे हाती लागले आणि ते दागिने घेवून चोरटे पसार तेथून पसार झाले. या गाठोड्यात महिलेने दोन तोळ्याचा चपला हार, २६ ग्रॅम वजनाच्या सोन्याच्या दोन बांगड्या, दीड ग्रॅम वजनाची चैन, पाच ग्रॅम वजनाची सोन्याची अंगठी असा सुमारे साडेसात तोळे वजनाचे दागिने चोरट्यांनी चोरुन नेले. देवघरात ठेवलेला चांदीचा गणपती, चांदीचा महादेव तसेच चांदीचा पेला, चांदीची वाटी, निरंजन, चार नग चांदीचे करंडे हेही चोरुन नेले.
श्वानपथकासह ठसे तज्ज्ञांचे पथक घटनास्थळी !
सकाळच्या सुमारास शेजारी राहणाऱ्यांच्या ही घटना लक्षात येताच, त्यांनी घटनेची माहिती दप्तरी यांना दिली. त्यानुसार त्यांनी घराच्या दिशेने धाव घेतली. यावेळी घटनेची माहिती मिळताच शहर पोलीस ठाण्याचे अधिकारी, डीबी कर्मचारी, श्वान पथक, फिंगर प्रिंट तज्ञ भोईटेनगरात दाखल झाले. त्यांनी घटनास्थळाची पाहणी केली. श्वानपथकाने दप्तरी वांच्या घरापासून लांबपर्यंत मार्ग दाखविला. परंतू त्याठिकाणाहून चोरटे वाहनातून पसार झाले असण्याची शक्यता पोलिसांनी वर्तवली. परिसरात सीसीटीव्ही फुटेजची पाहणी केली जात आहे. या प्रकरणी अनिता दप्तरी यांनी दिलेल्या तक्रारीनुसार शहर पोलीस ठाण्यात गुन्हा दाखल करण्यात आला आहे.
डब्यातील रोकड राहिली सुरक्षीत !
मंगळवारी परिचारिका असलेल्या अनिल दप्तरी यांना पगार मिळाला होता. त्यांनी पगाराचे पैसे त्यांनी किचनमधील एका स्टीलच्या डब्यात ठेवले होते. मात्र चोरट्यांनी डब्याला हात न लावल्यामुळे त्यांची पगाराचे पैसे सुरक्षीत राहिले. तसेच दुसऱ्या एका डब्यात नेहमी वापरासाठी शंभर रुपयांच्या नोटा ठेवल्या होत्या. त्यानांही चोरट्यांनी स्पर्श केला नसल्याची माहिती अनिता दप्तरी यांनी दिली.
