चोपडा (प्रतिनिधी) चोपडा वनपरिक्षेत्रातील चौगाव कक्ष क्र. २६० मध्ये अवैध वृक्षतोडीचा प्रकार उघडकीस आला आहे. २४ जानेवारी रोजी मध्यरात्री वनपरिक्षेत्र अधिकारी आणि त्यांच्या कर्मचाऱ्यांनी गुप्त माहितीच्या आधारे कारवाई केली. सागवान लाकडाची अवैध वाहतूक करणाऱ्या आरोपींना अडवण्याचा प्रयत्न करताच, त्यांनी वनरक्षक प्रकाश सुभाष पाटील यांच्यावर वाहन चढवून गंभीर जखमी केले.
वनपरिक्षेत्र अधिकाऱ्यांनी घटनास्थळी जप्त केलेल्या मुद्देमालामध्ये विना क्रमांकाची मोटारसायकल, सागवान लाकूड ०.१५१ घ.मी. (अंदाजे ३०५६ रुपये) आणि इतर उपकरणे समाविष्ट होती. तपासादरम्यान चौगांव येथील एका आरोपीच्या घराची झडती घेतली असता, कटाई मशीन, लाकूड कापण्याची अवजारे, ३५ सागवान लाकूड नग आणि तयार पलंग अशा सर्व वस्तू जप्त करण्यात आल्या. त्याची एकूण किंमत १,१४,६४४ रुपये होती.
ही कारवाई वनपरिक्षेत्र अधिकारी बी. के. थोरात यांच्या नेतृत्वाखाली आणि वरिष्ठ अधिकाऱ्यांच्या मार्गदर्शनाखाली पार पडली. आरोपींविरोधात कडक कायदेशीर कारवाई करण्याचे निर्देश देण्यात आले आहेत. जखमी वनरक्षक प्रकाश पाटील यांच्यावर चोपडा उपजिल्हा रुग्णालयात उपचार सुरू आहेत. वनविभागाच्या कर्मचाऱ्यांवर हल्ले अत्यंत गंभीर बाब आहेत, आणि असे प्रकार थांबवण्यासाठी कठोर कायदेशीर पावले उचलली जातील, असे वरिष्ठ अधिकाऱ्यांनी स्पष्ट केले आहे.
