मुक्ताईनगर (प्रतिनिधी) काही मिळालं, नाही मिळालं याचं दु:ख नाही, देवेंद्र फडणवीसांनी छळले. मी फक्त फडणवीसांवर नाराज आहे. माझ्यावर विनयभंगाचा खोटा गुन्हा दाखल झाला आणि तो देवेंद्र फडणवीसांना करायला लावला याचा मनस्ताप झाला. यासर्व मानसिक छळामुळेच पक्षांतराचा निर्णय घेतल्याची प्रतिक्रिया एकनाथराव खडसे यांनी दिली. ते मुक्ताईनगरात पत्रकारांशी बोलत होते.
गोपीनाथ मुंडे, प्रमोद महाजन, पांडुरंग फुंडकरांसारखे कितीतरी नेते होते, त्यांच्यासोबत आजतागातयत भाजपचं काम केलं. भाजपने मला अनेक मोठी पदं दिली, मी ती नाकारु शकत नाही. मी भाजपवर किंवा केंद्रातील नेत्यावर टीका केली नाही, असं खडसे म्हणाले. माझ्यासोबत एकही आमदार, एकही खासदार नाही. रक्षाताईंनी भाजप सोडणार नाही असं सांगितलं आहे, त्यांचा निर्णय घेण्यासाठी त्या सक्षम आहेत, असं खडसे म्हणाले. राष्ट्रवादी व काँग्रेसने माझ्या राजीनाम्याची मागणी केली नसताना माझा राजीनामा घेण्यात आला. खडसे म्हणाले की, माझी भाजपाविषयी तक्रार नाही, केंद्रीय नेतृत्वाविषयी वा प्रदेश कार्यकारीणीवर नाराज नाही तर विरोधी पक्षनेते देवेंद्र फडणवीसांवर नाराज असल्यानेच मी भाजपाला सोडचिठ्ठी देत असल्याचे ते म्हणाले.
भाजपासाठी उभे आयुष्य घालवले मात्र माझ्या चौकशा फडणवीसांनी लावल्या व त्यामुळे प्रचंड बदनामी सहन करावी लागली. मला काय मिळाले वा नाही, याच्याशी घेणे देणे नाही. माझ्या कथित पीएवर नऊ महिन्यांपासून पाळत ठेवण्यात आली व त्याची कबुली सभागृहात फडणवीसांनी दिली. जे पद मिळवले तर स्वतःच्या ताकदीवर मिळवल्याचे त्यांनी सांगतले. आजही मोठे आक्षेप असलेले नेते भाजपात कार्यरत असल्याचा आरोपही त्यांनी केला. जनतेची ताकद माझ्यासोबत असल्याचे ते म्हणाले. खासदार रक्षा खडसे वा अ‍ॅड.रोहिणी खडसे यांनी काय निर्णय घ्यावा हा त्यांचा प्रश्न असल्याचे ते म्हणाले. भाजपच्या प्राथमिक सदस्यत्वाचा राजीनामा, 40 वर्ष काम केलं, खेड्यापाड्यात भाजप पोहोचली नव्हती, मुंडे, महाजन, गडकरी, फरांदे, फुंडकर, मुनंगटीवार यांच्यासोबत प्रामाणिक काम, पक्षाने अनेक मोठी पदं दिली, भाजपवर रोष नाही, केंद्रीय नेत्यावर कधीही टीका नाही, असेही खडसे यांनी सांगितले.
