हैदराबाद (वृत्तसंस्था) कर्नाटक भाजपचे युवा नेते तथा खासदार तेजस्वी सूर्या यांनी एमआयएमचे प्रमुख असदुद्दीन ओवेसी यांच्यावर जोरदार टीकास्त्र सोडलंय. ‘मोहम्मद अली जिनांची भाषा बोलणाऱ्या असदुद्दीन ओवेसींना दिलेलं प्रत्येक मत देशविरोधी आहे तसंच ज्या मुल्यांवर भारत देश उभा आहे, त्या मुल्यांविरोधात ओवेसींना होणारं मतदान आहे’, असं तेजस्वी सूर्या म्हणाले.
“ओवेसी बंधू कधीच जुन्या हैदराबादचा विकास करणार नाही. ते केवळ रोहिंग्या मुस्लिमांना भारतात प्रवेश देतील. ओवेसींना मिळणारं प्रत्येक मत हे भारताच्या विरोधात पडणार मत असेल. असदुद्दीने ओवेसी हे विक्षिप्त इस्लाम, विभाजनवाद आणि टोकाच्या विचारसरणीच्या गोष्टी करतात याच गोष्टी मोहम्मद अली जिन्नाही करायचे,” अशा शब्दांमध्ये सुर्या यांनी ओवेसी बंधुंवर निशाणा साधला. ओवेसी इस्लामवाद, फुटीरतावाद आणि जिन्नांसारख्या अतिरेकीपणाची भाषा बोलतात. देशातील प्रत्येक नागरिकाने ओवेसींच्या फूट पाडणाऱ्या आणि जातीयवादी राजकारणाविरोधात उभे राहिले पाहिजे, अशी टीका तेजस्वी सूर्या यांनी केली. येत्या १ तारखेला होणाऱ्या हैदराबाद महानगरपालिका निवडणुकीत विजय मिळवून दक्षिणेत भाजप आपलं द्वार उघडणार असल्याचा विश्वास देखील सूर्या यांनी व्यक्त केला. हैदराबाद पालिका निवडणुकीमध्ये वर वर दोन पक्षांमधील लढाई दिसत असली तरी एआयएमआयएम, भाजपाबरोबरच टीएमसीही या निवडणुकीमध्ये चांगली कामगिरी करण्याची शक्यता आहे. या निवडणुकीचे निकाल ४ डिसेंबर रोजी लागणार आहेत.
