जळगाव (प्रतिनिधी) – शहरातील शालेय परिसरात मिनी मोबाईलद्वारे मुलींना भूरळ घालून त्यांना छुप्या पद्धतीने मोबाईल विक्री करणाऱ्यांचा पोलिसांच्या दामिनी पथकाने पर्दाफाश केला. पोलिसांनी शहरातील एका शाळेजवळ प्रायोगित तत्वावर ऑपरेशन सजग राबविण्यात आले होते. शालेय विद्यार्थिनींच्या सुरक्षेला आणि त्यांच्या वर्तनाला धोका निर्माण करणाऱ्या प्रकाराचा पर्दाफाश झाल्याने पालकांना सजग राहण्याचे आवाहन पोलिसांनी केले आहे.
जिल्ह्यामधील एका मुलींच्या शाळेच्या बाहेर गेल्या काही दिवसांपासून दामिनी पथकातील महिला अंमलदारांनी
साध्या वेशात पाळत ठेवली होती. शालेय विद्यार्थिनींच्या सुरक्षिततेचा आढावा घेणे हा या मोहिमेचा मुख्य उद्देश होता. या दरम्यान, हा प्रकार उघडकीस आला आहे. परिस्थितीचे गांभीर्य लक्षात घेत, दामिनी पथकाने तातडीने पावले उचलत काही शालेय विद्यार्थिनींकडून हे छोटे मोबाईल जप्त केले. त्यानंतर तातडीने शाळा प्रशासनाला आणि संबंधित विद्यार्थिनींच्या पालकांना बोलावून घेण्यात आले. त्यांच्या उपस्थितीत जप्त केलेले मोबाईल पालकांच्या ताब्यात देऊन या प्रकाराची कल्पना देण्यात आली. दरम्यान, या घटनेच्या पार्श्वभूमीवर जळगाव पोलीस दलातर्फे पालकांना सतर्कतेचे आवाहन करण्यात आले आहे.
संशयास्पद वावरणाऱ्यांची तात्काळ माहिती द्या
शाळांच्या जवळ, विद्यार्थी-विद्यार्थिनींच्या प्रवासाचे मार्ग, एसटी स्टँड, रिक्षा थांबे किंवा परिसरामध्ये असे लहान मोबाईल विकणारे किंवा संशयास्पद वावरणारे व्यक्ती
आढळल्यास तात्काळ दामिनी पथकाशी संपर्क साधावा अस आवाहन देखील करण्यात आले आहे.
शालेय परिसरात स्टॉलवर केली जात होती विक्री
शाळांच्या परिसराबाहेर काही इसमांकडून तात्पुरत स्टॉल थाटले जात होते. या स्टॉलवर अत्यंत लहान आकाराचे आणि स्वस्त (फक्त ९०० ते १००० रुप किंमत असलेले) मोबाईल गुप्तरित्या त्याची विक्र केली जात होती. हे मोबाईल आकाराने इतके लहान असतात की, ते कुठेही सहज लपवता येतात आणि पालकांनाही सहसा त्याची कुणकुण लागत नाही तसेच विक्रेते मुलींना स्वतःच्या फोनवरून किंवा या छोट्या मोबाईलद्वारे त्यांच्या बॉयफ्रेंडला फोन लावून देण्याचे गैरप्रकार करत असल्याचे तपासात निष्पन्न झाले.
