मुंबई (वृत्तसंस्था) देवेंद्र फडणवीस यांनी माझ्यावर केलेले सर्व आरोप बिनबुडाचे आहेत. देवेंद्र फडणवीस मुख्यमंत्री असताना त्यांचे अंडरवर्ल्डसोबत कनेकशन होते. याचा खुलासा उद्या सकाळी मी करणार असल्याचं अल्पसंख्याक मंत्री नवाब मलिक यांनी सांगितलं. फडणवीस बॉम्ब फोडणार होते ते फोडू शकले नाहीत पण मी मात्र मुंबईत उद्या हायड्रोजन बॉम्ब फोडणार असल्याचा इशाराही मलिक यांनी दिला.
देवेंद्र फडणवीस यांनी आज पत्रकार परिषद घेऊन मलिक यांचा अंडरवर्ल्डशी संबंध असल्याचा दावा केला. त्याला मलिक यांनी प्रत्युत्तर दिले व फडणवीस यांच्या दाव्याची खिल्ली उडवली. ‘देवेंद्र फडणवीस यांनी घोषणा केली होती की ते दिवाळीनंतर फटाके फोडणार मात्र त्यांचे फटाके भिजले आणि त्याचा आवाजच येऊ शकला नाही. एक माहोल तयार केला गेला की नवाब मलिक यांचे बॉम्बस्फोटातील आरोपींशी संबंध आहेत. त्यासाठी काही कागदपत्रे समोर आणली. पण त्यांना ज्यांनी कुणी माहिती दिली ते कच्चे खिलाडी आहेत, असेच मी म्हणेन. तुम्ही सांगितलं असतं तर मीच तुम्हाला ही कागदपत्रे दिली असती. यापेक्षा आणखीही बरीच कागदपत्रे आहेत तीही उपलब्ध करून दिली असती’, असा टोला मलिक यांनी लगावला.
अंडरवर्ल्डच्या दबावातून किंवा बॉम्बस्फोटातील आरोपीकडून कुर्ला येथील जागा आम्ही घेतलेली नाही. जे काही व्यवहार झाले आहेत त्याचे कागदोपत्री पुरावे आमच्याकडे आहेत. याची चौकशी एनआयएने करू द्या नाहीतर सीबीआयने. आम्ही कोणत्याही चौकशीला सामोरे जाण्यास तयार आहोत. आम्ही कुणाला घाबरत नाही, असे आव्हान मलिक यांनी दिले. त्याचवेळी मलिक यांनी फडणवीस यांना इशारा दिला. ‘फडणवीस, तुम्ही अंडरवर्ल्डचा खेळ सुरू केलाच आहे तर आज सारं काही मी सांगणार नाही पण उद्या सकाळी १० वाजता देवेंद्र फडणवीस आणि अंडरवर्ल्डचा काय खेळ या महाराष्ट्रात चालला होता. त्यांनी अंडरवर्ल्डच्या माध्यमातून पूर्ण मुंबई शहराला कसे ओलीस ठेवले होते, याची माहिती मी उद्या देणार आहे’, असे मलिक म्हणाले. फडणवीस यांची जवळची माणसं प्लॉट हडप करण्याचे धंदे कोणत्या अधिकाऱ्याच्या माध्यमातून करत होते? कोणता आंतरराष्ट्रीय डॉन तेव्हा विदेशातून भारतात आला होता? तो कुणासाठी काम करत होता हे सर्व मी देशासमोर ठेवणार आहे. फडणवीस बॉम्ब फोडणार होते ते फोडू शकले नाहीत पण मी मात्र मुंबईत उद्या हायड्रोजन बॉम्ब फोडणार आहे, असा इशाराच मलिक यांनी दिला. मी हसीन पारकरला ओळखत नाही, असे उत्तरही मलिक यांनी एका प्रश्नाच्या उत्तरात दिले.
