पुणे (वृत्तसंस्था) रुममेटच्या सिगारेट ओढण्याच्या सततच्या आग्रहाला कंटाळून एका तरुणाने आत्महत्या केल्याची खळबळजनक घटना पुण्यातील कर्वे नगर भागातल्या गुरुदत्त कॉलनीत घडली आहे. सागर अशोक पवार असं आत्महत्या केलेल्या १८ वर्षीय तरुणाचे नाव आहे.
या प्रकरणी पोलिसानी लक्ष्मण वासुदेव पाटील (वय ३०, गुरुदत्त कॉलनी) याला पोलिसानी अटक केली आहे. सागर पवारने त्याचे बारावीचे वर्ष नुकतेच पूर्ण केले होते. तो अनाथ असल्याने आश्रमशाळेत शिक्षण घेत होता. शिक्षणानंतर मार्केटिंग क्षेत्रातील एका खासगी कंपनीत सागर कामालाही लागला होता. लक्ष्मण पाटील हा त्याचा रुममेट होता. लक्ष्मणने सागरला खोलीत आल्या दिवसापासून सिगारेट ओढण्याची सक्ती करण्यास सुरुवात केली. यासाठी त्याने सागरच्या मागे तगादाच लावला. सागरने लक्ष्मणला स्पष्ट शब्दांमध्ये नकार दिला होता. मात्र लक्ष्मण ऐकतच नव्हता तू सिगारेट ओढ नाहीतर तुला ठार करेन अशी धमकीही लक्ष्मणने सागरला दिली. या सगळ्याचा ताण असह्य झाल्याने सागरने आत्महत्या केली अशी माहिती पोलिसांनी दिली आहे. आत्महत्या करण्यापूर्वी सागरने लिहिलेल्या चिठ्ठीमुळे ही घटना समोर आली आहे.
