जळगाव (प्रतिनिधी) संपूर्ण जिल्ह्यासह राज्याला हादरवून सोडणाऱ्या जीएसटी घोटाळा प्रकरणी मुख्य संशयित पिंटू इटकरेला नाशिक न्यायालयाने १४ दिवसांची न्यायालयीन कोठडी सुनावली आहे. तर दुसरीकडे वस्तू व सेवाकर (जीएसटी) गुप्तचर महासंचालनालयाच्या केंद्रीय पथकाने तपास चक्र अधिक गतीने फिरवायला सुरुवात केली आहे.
डीजीजीआयचे वरिष्ठ गुप्तचर अधिकारी ब्रिज भूषण त्रिपाठी यांच्या पथकाने बुधवारी ही धाड टाकली होती. दरम्यान, जीएसटी घोटाळ्याशी संबंधित हे धाडसत्र होते. त्यानुसार एका स्टील कंपनीच्या जीएसटीच्या पत्त्यावर चक्क मेडिकल सुरु असल्याचे आढळून आले होते. तर अन्य एकाला आपल्या नावावर स्टील कंपनी असल्याचे माहितच नव्हते. डीजीजीआयच्या पथकाने जळगावमधून पिंटू इटकरे या दोघांना ताब्यात घेतले होते.भारुडे आणि इटकरे हे दोघं नात्याने शालक-मेहुणे आहेत. त्यामुळे कैलास भारुडेला पथकाने न्यायालयीन प्रक्रिया म्हणून सोबत नेले होते. इटकरेला शुक्रवारी सायंकाळी नाशिक कोर्टात हजर केले असता १४ दिवसांची न्यायालयीन कोठडी सुनावण्यात आली. दरम्यान, सूत्रांनी दिलेल्या माहिती नुसार हा जीएसटी घोटाळा १०० कोटीच्या घरात आहे. जवळपास १०० हून अधिक खात्यातून हा व्यवहार झाला असून मुख्यसूत्रधार तथा लाभार्थी जळगावचा असल्याचे समोर आले आहे. दरम्यान, मुख्य सूत्रधाराची जळगावात फायनान्स कंपनी आहे.
