भुसावळ (प्रतिनिधी) – शहरातील यावल रोड परिसरात दुकानाचे कुलूप तोडून चोरी करणाऱ्या सराईत चोरट्याला भुसावळ शहर पोलिसांच्या डीबी पथकाने अमळनेर येथून शिताफीने ताब्यात घेतले. शांताराम उर्फ शन्या प्रताप कोळी असे ताब्यात घेण्यात आलेल्या आरोपीचे नाव आहे.
भुसावळ शहरातील तापी स्टीलसमोर, यावल रोड येथे फिर्यादी बलवंतसिंग बहादुरसिंग पटेल (वय ५५, रा. अकुलुदा, ता. यावल) यांच्या मालकीचे ‘गॅरेज व पटेल बीअर शॉपी’ हे दुकान आहे. दि ३० जून २०२६ रोजीच्या रात्री ते १ जुलै २०२६ रोजी सकाळी ९ वाजेच्या दरम्यान अज्ञात चोरट्याने दुकानाचे कुलूप तोडून तसेच खिडकीचे गज तोडून आत प्रवेश केला. चोरट्याने दुकानातील डीव्हीआर व ६ हजार रुपये रोख, असा मुद्देमाल लंपास केला होता.
या प्रकरणी भुसावळ शहर पोलीस ठाण्यात गुन्हा दाखल करण्यात आला होता. गुन्ह्याचा तपास सुरू असताना पोलिसांना मिळालेल्या गुप्त माहितीच्या आधारे डीबी पथकातील पोलीस नाईक रज्जाक खान, पोलीस कॉन्स्टेबल राहुल भोई आणि पोलीस कॉन्स्टेबल दीपक पाटील यांनी अमळनेर येथे कारवाई करत आरोपी शांताराम उर्फ शन्या प्रताप कोळी याला ताब्यात घेतले. पोलिसांनी केलेल्या चौकशीत आरोपीने सदर गुन्ह्याची कबुली दिल्याचे पोलिसांनी सांगितले. आरोपी हा सराईत गुन्हेगार असून त्याच्याविरुद्ध जळगाव व नंदुरबार जिल्ह्यांत वाईन शॉप फोडून चोरी केल्याचे गुन्हे दाखल असल्याची माहिती समोर आली आहे. ही उल्लेखनीय कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी (भुसावळ विभाग) केदार बारबोले यांच्या मार्गदर्शनाखाली पोलीस निरीक्षक महेश गायकवाड यांच्या नेतृत्वाखाली करण्यात आली. या गुन्ह्याचा पुढील तपास पोलीस हवालदार दीपक पाटील करीत आहेत.
