मुंबई (वृत्तसंस्था) भाजप नेते किरीट सोमय्या यांनी दोन मंत्र्यांची भ्रष्टाचाराची प्रकरणे असून त्यातील एका मंत्र्याचा घोटाळा आपण सोमवारी उघड करू असे जाहीर केले होते. त्यानुसार आज सोमय्या यांनी राष्ट्रवादी काँग्रेसचे नेते आणि राज्याचे ग्रामविकास मंत्री हसन मुश्रीफ यांचे नाव जाहीर केले आहे. हसन मुश्रीफ यांच्यावर १२७ कोटींच्या भ्रष्टाचाराचा आरोप सोमय्या यांनी केला आहे.
यावेळी सोमय्या म्हणाले, ठाकरे सरकारमधील ईलेव्हनमध्ये राखीव खेळाडूंची यादी वाढत चालली आहे. आज यामध्ये हसन मुश्रीफ यांचे नाव वाढवत आहोत. मुश्रीफ परिवाने शेकडो कोटींचे घोटाळे केले आहेत. बोगस कंपन्या आहेत. आमच्याकडे २७०० पेजेसचे पुरावे आहेत. हे मी आयकर विभागाकडे दिले आहेत. नामित मुश्रीफ आणि हसन मुश्रीफ यांनी ११ कंपन्यांच्या माध्यमातून भ्रष्टाचार केला आहे.
त्यावेळी त्यांनी सांगितले की, शिवसेनेचा एक आणि राष्ट्रवादी काँग्रेसचा एक मंत्री अशा २ मंत्र्यांच्या घोटाळ्यांची फाईल हाती लागली आहे. त्यामध्ये आज हसन मुश्रीफ यांचा १२७ कोटींच्या घोटाळ्याचा पर्दाफाश केला आहे. तर एका मंत्र्यांचा भ्रष्टाचार पुढच्या आठवड्यात उघड करणार असल्याचे त्यांनी सांगितले. मुश्रीफ यांच्या कुटुंबीयांनी मनी लाँडरिंग, बेनामी व्यवहारांद्वारे १२७ कोटींचा घोटाळा केला. याबाबत सोमय्या यांनी हसन मुश्रीफ, मुश्रीफ यांची पत्नी आणि त्यांचे पुत्र नावेद यांच्याविरुद्ध आयकर अधिकाऱ्याकडे तक्रार करून मुश्रीफ कुटुंबीयांची चौकशी करण्याची मागणी केली आहे.
उद्या मुंबई ईडीकडे तक्रार करणार आहे. त्यांना पुरावे देणार आहे. केंद्रीय अर्थमंत्रालय कडे पुरावे देणार आहे. ठाकरे सरकारच्या ११ खेळाडूंमध्ये राखीव खेळाडूमध्ये वाढ होणार आहे, असे सोमय्या यांनी सांगितले.
