अमळनेर (प्रतिनिधी) महाराष्ट्र राज्य कोअर कमिटी व शिक्षण संघर्ष संघटना यांच्या विद्यमाने आझाद मैदानावर बेमुदत महाविश्वास धरणे आंदोलन सुरू असून येणाऱ्या मंगळवारी ४ जानेवारी रोजी आरोग्यमंत्री राजेश टोपे आंदोलनास भेट देणार असून मंगळवारी शिक्षक बांधवांनी मोठ्या संख्येने उपस्थित राहण्याचे आवाहन शिक्षण संघर्ष संघटनेच्या अध्यक्षा संगीताताई शिंदे यांनी केले आहे.
जुन्या पेन्शनचे हे आंदोलन आपले असून कोणी मला फोन करून बोलाविले पाहिजे अशी अपेक्षा न करता प्रत्येकाने आपापली जबाबदारी व कर्तव्य लक्षात घेता जातीने उपस्थित झाले पाहिजे. या संदर्भात कोणी कुठलेही गैरसमज पसरवू नये. जोपर्यंत जुनी पेंशन लागू होत नाही व शासन स्तरावर सकारात्मक निर्णय लागत नाही तोपर्यंत हे बेमुदत धरणे आंदोलन सुरूच राहणार आहे.
आपले सेवानिवृत्त शिक्षक बांधव आझाद मैदानावर अविरत आंदोलनास बसले असून त्यांना बळ देणे हे आपले कर्तव्य आहे. त्यांचे मनोधैर्य उंचावण्यासाठी जे जे शक्य होईल ते प्रयत्न करणे आपले कर्तव्य आहे. पेंशन हा आपला हक्क आहे व तो मिळेपर्यंत न थांबता हे आंदोलन आपल्याला पुढे न्यायचे आहे. आंदोलनाचे सातत्य लक्षात घेता महाराष्ट्र राज्याचे आरोग्यमंत्री राजेशजी टोपे साहेब येणाऱ्या मंगळवारी आंदोलनास भेट देणार असून मंगळवारी राज्यातील बहुसंख्य शिक्षक बांधवांनी आंदोलन स्थळी उपस्थित राहण्याचे आवाहन शिक्षण संघर्ष संघटनेचया अध्यक्षा संगीताताई शिंदे यांनी केले आहे.
