चंद्रपूर (वृत्तसंस्था) मोठ्या आनंदात भाचीचा वाढदिवस साजरा केला. पण रस्त्यातच अज्ञात वाहनाने जबर धडक दिल्याने दुचाकीस्वार मामाचा जागीच मृत्यू झाल्याची दुर्दैवी घटना चंद्रपूर गडचिरोली मार्गावरील अजयपूरजवळ बुधवारी रात्री ९:०० वाजण्याच्या सुमारास घडली. या अपघातात दुचाकीवर मागे बसलेला तरुणही गंभीर जखमी झाला. प्रशांत विलास मांढरे (३५, रा. आकाशवाणी रोड, अथर्व कॉलनी, चंद्रपूर), असे मयत तर नूतन अरूण आत्राम (२५, रा. अथर्व कॉलनी, चंद्रपूर) असे जखमी तरुणाचे नाव आहे.
प्रशांत मांढरे यांच्या भाचीचा मूल तालुक्यातील आकापूर येथे वाढदिवस होता. वाढदिवसासाठी ते आपल्या मित्रासह दुचाकी क्रमांक (एमएच ३४. बीक्यू ७९८५)ने आकापूर येथे गेले होते. वाढदिवसाचा कार्यक्रम आटोपून दोघेही रात्री परत चंद्रपूरला येण्यासाठी निघाले. बुधवारी रात्री ९:०० वाजण्याच्या सुमारास अजयपूरजवळ अज्ञात वाहनाने त्यांच्या दुचाकीला जबर धडक दिली. यात प्रशांत मांढरे यांचा जागीच मृत्यू झाला होता तर नूतन आत्राम हा जखमी झाला होता. दरम्यान, धडक देणारे अज्ञात वाहनाने अपघात होताच, घटनास्थळावरून पलायन केले.
