जळगाव (प्रतिनिधी) महामार्ग ओलांडत असतांना भरधाव वेगाने जाणाऱ्या आयशरने दुचाकीस्वाराला उडविले. ही घटना महामार्गावरील साईराज रेस्ट्रॉरंटसमोर रात्री साडेआठ वाजेच्या सुमारास घडली. या अपघातात दीपक गोकुळ सोनवणे व त्यांचा मुलगा लोकेश दीपक सोनवणे (वय ५, रा. बीबा नगर) हे बाप लेक गंभीर जखमी झाले असून त्यांच्यावर खासगी रुग्णालयात उपचार सुरु आहे.
शहरातील बीबा नगरात दीपक सोनवणे हे वास्तव्यास असून ते (एमएच १९ डीयू १४४७) क्रमांकाच्या दुचाकीने मुलगा लोकशला घेवून द्वारका नगरात जाण्यासाठी निघाले. महामार्ग ओलांडत असतांना पाळधीकडून जळगावकडे जाणाऱ्या (एमएच ३१ एफसी ४७४५) क्रमांकाच्या आयशरने त्यांच्या दुचाकीला जोरदार धडक दिली. या अपघातात दुचाकीस्वार दीपक सोनवणे त्यांच्या मुलगा लोकेश हे दोघ गंभीर जखमी झाले. दरम्यान, महामार्गावरुन जाणाऱ्या नागरिकांनी जखमी बापलेकाला तात्काळ वाहनातून खासगी रुग्णालयात दाखल केले. त्यांच्यावर उपचार सुरु असून त्यातील एकाची प्रकृती गंभीर आहे.
पावभाजी घेवून जातांना झाला अपघात !
दीपक सोनवणे हे सोबत पावभाजी आणि मुलाच्या अभ्यासाठी स्टडी टेबल घेवून जात होते. याचवेळी त्यांच्या दुचाकीचा अपघात झाल्याने त्यांच्या वाहनावर भाजी पडलेली होती. तर त्याच ठिकाणी मुलाचा स्टडी टेबल पडलेला होता.
धडक देणारा आयशर ताब्यात !
अपघाताची माहिती मिळताच तालुका पोलीस ठाण्याचे पोलीस कर्मचारी अनिल फेगडे यांच्यासह कर्मचाऱ्यांनी घटनास्थळी धाव घेतली. धडक देणारा आयशर ट्रक त्यांनी ताब्यात घेतला असून तो पोलीस ठाण्यात जप्त करण्यात आला आहे.
