धरणगाव (प्रतिनिधी) उत्तर महाराष्ट्र विद्यापीठ बांभोरी येथून विद्यार्थांचे शालेय साहित्य पुणे येथे घेऊन जाण्याबाबत ऑनलाईन जाहिरात करून भारतीय सैन्याच्या नावाखाली ट्रक ड्रायव्हरला ६२ हजारात गंडवल्याप्रकरणी धरणगाव पोलिसात दोघांविरुद्ध गुन्हा दाखल करण्यात आला आहे.
या संदर्भात अधिक असे की, दोन व्यक्तींनी १४ ऑगस्ट रोजी उत्तर महाराष्ट्र विद्यापीठ बांभोरी येथून विद्यार्थांचे शालेय साहित्य पुणे येथे घेऊन जाण्याबाबत ऑनलाईन जाहिरात केली होती. त्यानुसार अजमल खान सांडू खान (वय ३८, धंदा – ट्रक चालक रा. साठ घर मोहल्ला पाळधी बु. ता.धरणगाव) यांच्या मालकाने संबंधित मोबाईलवर बोलणे करत ४० हजार भाडे ठरवले आणि माझा ट्रक ड्रायव्हर पाठवतो असे सांगितले. त्यानुसार अजमल खान हे दुपारी चार वाजेच्या सुमारास बांभोरी पोहचले. परंतू तेथे कुणीही उपस्थित नव्हते. त्यामुळे अजमल खान यांनी मोबाईल क्र. ६३७००७६११७ धारक मनिष पांडेला फोन लावला. त्यांनी थोडा वेळ थांबायला सांगितले. थोड्यावेळानंतर अजमल यांना मनीष पांडेचा फोन आल की, मै तुम्हारे व्हॉटसप पे इंडियन आर्मी का बारकोड (क्युआर कोड) भेज रहा हु. आप उसको आपके ‘गुगल पे’ पर स्कॅन तुम्हारा अकाउंट नंबर सही है क्या, और हमारा अकाउंट नंबर सही है क्या मॅच करके चेक कर लो. मैं आपको भाडे के ३८ हजार भेजता हुं. अजमल खान यांनी आपले गुगल पे असल्याचे हो सांगीतले. त्यानंतर पांडे याने थोड्यावेळात हेडक्वाटरसे फोन येईल, असे सांगितले. थोड्यावेळाने ६३७०६७१०१५ या नंबरवरून विकास तिवारी नामक व्यक्तीचा फोन आला आणि त्याने सांगितले की, इंडियन आर्मी का रूल हैं कि पैसे पेहले आप डालो फिर हम रिफंड करेंगे. त्यावर अजमल खान यांनी पहिल्यांदा ३५ हजार नंतर २५ आणि शेवटी २ हजार, असे एकूण ६२ हजारात फसवणूक केली. यासंदर्भात मनीष पांडे आणि विकास तिवारी नामक व्यक्तींविरुद्ध गुन्हा दाखल करण्यात आला असून पुढील तपास पो.हे.कॉ. गजानन अर्जुन महाजन हे करीत आहेत.
