जळगाव, (प्रतिनिधी) – राज्याचे महसूल मंत्री तथा दुष्काळ निवारण मंत्रिमंडळ उपसमितीचे अध्यक्ष चंद्रशेखर बावनकुळे यांनी जळगाव दौऱ्यादरम्यान एरंडोल तालुक्यातील पातरखेडे येथे दुष्काळसदृश परिस्थितीची पाहणी केली. पावसाअभावी पिकांचे झालेले नुकसान आणि शेतकऱ्यांच्या अडचणींचा त्यांनी प्रत्यक्ष शेतात जाऊन आढावा घेतला. यावेळी पीक नुकसानीचे अचूक पंचनामे तातडीने पूर्ण करून अहवाल सादर करण्याचे निर्देश त्यांनी संबंधित अधिकाऱ्यांना दिले.
पातरखेडे येथे महसूल मंत्री बावनकुळे यांनी स्थानिक शेतकऱ्यांशी संवाद साधत त्यांच्या समस्या, अडचणी आणि मागण्या जाणून घेतल्या. यावेळी त्यांनी शेतकऱ्यांसोबत सहभोजनही केले. पावसाअभावी पिकांवर झालेल्या परिणामांची माहिती त्यांनी संबंधित अधिकाऱ्यांकडून घेतली. तसेच, शेतकऱ्यांना शासन त्यांच्या पाठीशी असून नुकसानग्रस्तांना दिलासा देण्यासाठी आवश्यक कार्यवाही करण्यात येईल, असा विश्वास दिला.
पावसाअभावी निर्माण झालेल्या परिस्थितीमुळे शेतकऱ्यांचे मोठ्या प्रमाणावर नुकसान होण्याची शक्यता लक्षात घेता, पीक नुकसानीचे पंचनामे अचूकपणे आणि कोणतीही दिरंगाई न करता पूर्ण करावेत. तसेच, पंचनाम्यांचा अहवाल तत्काळ शासनाकडे सादर करावा, असे स्पष्ट निर्देश महसूल मंत्री बावनकुळे यांनी संबंधित यंत्रणेला दिले.
यावेळी जलसंपदा (विदर्भ, तापी व कोकण खोरे विकास महामंडळ) तथा आपत्ती व्यवस्थापन मंत्री गिरीश महाजन, खासदार स्मिता वाघ, आमदार नंदकिशोर महाजन, आमदार अमोल जावळे, आमदार अमोल पाटील, जिल्हाधिकारी, जिल्हा परिषदेचे मुख्य कार्यकारी अधिकारी, पोलीस अधीक्षक, उपविभागीय अधिकारी, तहसीलदार यांच्यासह विविध विभागांचे अधिकारी, शेतकरी आणि नागरिक उपस्थित होते.
