भुसावळ (प्रतिनिधी) कंत्राटी बीएएमएस डॉक्टरांना शासकीय सेवेत समाविष्ट करण्यात यावे, अशी मागणी डॉ. नि.तू पाटील यांनी एका पत्राद्वारे राज्यपाल भगतसिंग कोश्यारी यांना केली आहे.
पत्रात म्हंटले आहे की, कोरोना प्रादुर्भाव वाढत असतांना ग्रामीण भागात, खेडोपाडी प्राथमिक आरोग्य केंद्र आणि त्याठिकाणी रुग्ण सेवा करणारे कंत्राटी बीएएमएस डॉक्टर मंडळी यांचाच आधार होता. ही सर्व मंडळी आपल्या जीवाची आणि परिवाराची कुठलीही पर्वा न करता कोरोनाबाधित रुग्ण तपासणे, स्वाब जमा करणे, गावात जनजागृती करणे, शक्य असेल त्यांचे उपचार करणे, काहींना मोठ्या सेंटरमध्ये पाठवणे, माहिती संकलित करणे, आदी आदी कार्य इमानेइतबारे करत आहे. त्यांच्या जीवावर आपण खेड्यापाड्यात पहिली करोना संक्रमण लाट रोखू शकलो,आणि अजूनही दुसरी लाट ग्रामीण भागात रोखण्यासाठी प्रयत्न सुरू आहेत.
आता, बंधपत्रित एमबीबीएस डॉक्टर यांना ग्रामीण भागात १ वर्ष सेवा देणे बंधनकारक असल्याने राज्यातील जवळपास च्या वर कंत्राटी बीएएमएस डॉक्टरांच्या पोटावर लाथ बसत आहे.
जेव्हा शासनाला आरोग्य सेवा देण्यासाठी कोणी तयार नव्हते, तेव्हा बीएएमएस पदवी धारक “स्वतः हा” पुढे आले आणि आता मात्र एमबीबीएस डॉक्टर मंडळी यांना “बंधनकारक” असल्याने लगेच शासन कार्यरत डॉक्टरांना घरचा रस्ता दाखवत आहे. यामुळे डॉ. आणि त्यांचे परिवार यांची घोर निराशा सरकारने केली असून “गरज सरो अन् वैद्य मरो” ही म्हण सरकार खरी करतांना दिसत आहे. राज्यात बीएएमएस पदवी धारक यांना जुन २०१९ मध्ये शासनाने स्थायीपद देऊन सेवेत समाविष्ट करण्यात आले. तेव्हा हा धोरणात्मक निर्णय घेतांना सर्वांना ग्रामीण भागात, खेडोपाडी सेवा द्यावी लागेल असे सांगण्यात आले. त्यामुळे आता ग्रामीण भागात डॉक्टर मंडळींची उपलब्धता आहे.
ग्रामीण भागातच सेवा देण्याचा नियम शिथिल केल्यास, खालील काही उपाययोजनांवर विचार झाल्यास योग्य तो सुवर्णमध्य साधला जाईल,
1. बंधपत्रित एमबीबीएस डॉक्टर यांना ग्रामीण रुग्णालय, ट्रामा केअर सेंटर, महिला-रुग्णालय, उपजिल्हा रुग्णालय, क्षय रुग्णालय, नगरपालिका संचलित रुग्णालय आदी ठिकाणी नियुक्ती द्यावी, जेणे करून याठिकाणी त्यांच्यामुळे रुग्णांना फायदा होईल.
2. सध्या कोरोना कार्यकाळ आणि पुढील संभाव्य लाट पाहता कॉविड रुग्णालय, समर्पित कॉविड रुग्णालय, विलगिकरण विभाग, कॉविड चिल्ड्रन केअर केंद्र याठिकाणी नियुक्ती द्यावी.
3. जिल्हा सामान्य रुग्णालय,शासकीय मेडिकल कॉलेज हॉस्पिटलमध्ये,शासन मान्य सामाजिक संस्थांचे रुग्णालय याठिकाणी नियुक्ती द्यावी,
4 .ग्रामीण भागात सेवा देणे बंधनकारक असेल तर एक बंधपत्रित एमबीबीएस डॉक्टर आणि एक बीएएमएस डॉक्टर यांची नियुक्ती करावी.
आमची आपल्याकडे नम्र विनंती आहे की, मरणोत्तर ५० लाख मिळतील तेव्हा मिळतील फक्त “शाब्दिक करोना योध्दा सम्मान” हे बिरुद न लावता सर्व कंत्राटी BAMS डॉक्टरांनी कोरोना काळात केलेल्या सेवेचा सन्मान करत, धोरणात्मक निर्णय घेत या सर्वांना शासकीय सेवेत समाविष्ट करण्यात यावे.
कोरोना युध्दात नवीन सैनिक मिळाले, तेव्हा तुमची गरज संपली
कोरोना योध्दा कोरोनाशी लढून जीवंत राहीले ही आमची चुक झाली त्यापेक्षा कोरोना संक्रमणाने मरण पावलो असतो तर बरे झाले असते. निदान शासनाकडून ५० लाख मिळुन कुटुंबाचा ऊदरनिर्वाह झाला असता. आता युध्दात नवीन सैनिक मिळाले, तेव्हा तुमची गरज संपली आता घरी जा, अशी भावना प्राथमिक आरोग्य केंद्राच्या बेरोजगार झालेल्या कंत्राटी डॉ. ने व्यक्त केली.
