भुसावळ (प्रतिनिधी) – वरणगाव येथे अल्पवयीन मुलीला लग्नाचे आमिष दाखवून तिच्यावर अत्याचार केल्याचा तसेच तिचे फोटो व्हायरल करण्याची धमकी देऊन तिला पालकांच्या ताब्यातून पळवून नेल्याचा गंभीर प्रकार समोर आला आहे. या प्रकरणी वरणगाव पोलिस ठाण्यात १९ वर्षीय तरुणाविरुद्ध गुन्हा दाखल करण्यात आला असून, पोलिसांनी त्याला अटक केली आहे.
पोलिसांच्या माहितीनुसार, विकी राजेंद्र माळी (वय १९, रा. मकरंदनगर, वरणगाव) याच्याविरुद्ध गुन्हा दाखल करण्यात आला आहे. पीडित मुलगी अल्पवयीन आहे. आरोपीने तिला लग्नाचे आमिष दाखवून सुसरी गावाच्या शिवारातील एका शेतातील पत्र्यांच्या शेडमध्ये नेले. तेथे तिच्या इच्छेविरुद्ध अत्याचार केल्याचा आरोप आहे.
यानंतर तिचे फोटो व्हायरल करण्याची धमकी देत तिला पालकांच्या कायदेशीर ताब्यातून पळवून नेल्याचे तक्रारीत नमूद करण्यात आले आहे. या प्रकरणी वरणगाव पोलिस ठाण्यात गुन्हा दाखल करण्यात आला आहे.
गोपनीय माहितीच्या आधारे शोधमोहीम
गुन्हा दाखल झाल्यानंतर आरोपी आणि अल्पवयीन मुलीचा शोध घेण्यासाठी वरणगाव पोलिसांचे पथक रवाना करण्यात आले. पोलिसांनी गोपनीय माहिती तसेच तांत्रिक तपासाच्या आधारे शोध सुरू केला. तपासादरम्यान आरोपी आणि पीडित मुलगी पोलिसांना मिळून आल्याचे पोलिसांनी सांगितले. त्यानंतर महिला पोलिस कर्मचाऱ्याच्य उपस्थितीत पीडितेचा जबाब नोंदविण्यात आला. तिच्या जबाबाच्या आधारे गुन्ह्यात वाढीव कलमे लावण्यात आली. त्यानंतर पोलिसांनी आरोपीला अटक केली.
पहाटे आरोपीला अटक
या प्रकरणातील आरोपीला १ सप्टेंबर रोजी पहाटे २.२३ वाजता अटक करण्यात आली आहे. प्रकरणाचा पुढील तपास वरणगाव पोलिस अधिकारी अमित कुमार बागुल, पोलिस प्रशांत ठाकुर, सुखराम सावकारे, भूषण माळी, पोलिसांकडून सुरू आहे. तपासात आणखी काही बाबी समोर येण्याची शक्यता पोलिसांकडून व्यक्त करण्यात येत आहे.
