जळगाव (प्रतिनिधी) चरित्र्याचा संशयावरून पत्नी व मुलीला केटामाईन विषारी इंजेक्शन देवून त्यांचा खून करणाऱ्या सचिन गुमानसिंग जाधव याला आजन्म सश्रम कारावास आणि दंडाची शिक्षा सुनावली आहे. हा निकाल सोमवार दि. ५ ऑगस्ट रोजी जिल्हा व सत्र न्यायालयाने दिला आहे.
शहरातील रिंगरोडवरील एका हॉस्पिटलमध्ये सचिन जाधव हा आपल्या पत्नी कविता आणि मुलगी रिनाक्षी यांच्यासह वास्तव्यास होता. सचिन हा नेहमी पत्नी कविता यांच्यावर चारित्र्यावर संशय घेऊन छळ करत होता. दरम्यान दि. ५ मे २०१६ रोजी मध्यरात्री त्याने पत्नी कविता आणि मुलगी मीनाक्षी हे दोघे जण गाढ झोपेत असतांना केटामाईन विषारी औषध इंजेक्शनद्वारे देऊन त्यांना जीवेठार केले होते. या घटनेबाबत जिल्हापेठ पोलीस ठाण्यात गुन्हा दाखल करण्यात आला होता. या गुन्ह्यात तपासा अधिकारी सुप्रिया देशमुख, पोलीस निरीक्षक शाम तडवलकर आणि पोलीस उपनिरीक्षक कुबेर चौरे यांनी तपास पूर्ण करून दोषारोपपत्र न्यायालया दाखल केले.
न्यायालयाने २४ जणांची नोंदविली साक्ष
हा खटला जळगाव जिल्हा न्यायालयातील न्यायमूर्ती जे. जे. मोहिते यांच्या न्यायालयात चालविण्यात आला. यामध्ये एकूण २४ जणांची साक्ष नोंदवण्यात आली. फिर्यादी तुषार राजपूत, डॉक्टर पाठक आणि महिलेच्या माहेरचे नातेवाईका यांची साक्ष महत्त्वाची ठरली.
दोषी ठरवित ठोठवली आजन्म कारावास
त्यानुसार न्यायालयाने दोषी ठरवत संशयित आरोपी सचिन गुमानसिंग जाधव याला आजन्म सश्रम कारावास आणि दंडाची शिक्षा सुनावली आहे. सरकार पक्षातर्फे अतिरिक्त शासकीय अभियोग्यता निलेश चौधरी यांनी काम पाहिले, त्यांना अॅड. हर्षल राजपूत, पैरवी अधिकारी चेतन ठाकरे यांनी सहकार्य केले.
