मुक्ताईनगर (प्रतिनिधी) एकनाथराव खडसे यांच्या जाण्याने काहीही फरक पडणार नाही, म्हणणारे भाजपचे नेते गिरीश महाजन यांना जबर धक्का पोहचला आहे. जामनेरमधील शेकडो कार्यकर्त्यांनी आज मुक्ताईनगर येथे एकनाथ खडसे, जिल्हा बँकेच्या अध्यक्षा रोहिणी खडसे खेवलकर, व राष्ट्रवादीचे जिल्हाध्यक्ष रवींद्र भैय्या पाटील यांच्या उपस्थितीत राष्ट्रवादीमध्ये प्रवेश केला आहे.
गिरीश महाजनांच्या जामनेर मतदारसंघातील दोन बसेस भरून जवळपास २५० कार्यकर्त्यांनी राष्ट्रवादीमध्ये प्रवेश केला आहे. दोन बसेसद्वारे आलेल्या २५० पेक्षा जास्त कार्यकर्त्यांनी राष्ट्रवादी प्रवेश केला आहे. त्यामुळे भाजपला हा मोठा धक्का मानला जात आहे. दरम्यान, सोमवारी २ नोव्हेंबर रोजी सुद्धा जळगाव जिल्ह्यातील अनेक भाजप कार्यकर्त्यांनी राष्ट्रवादी काँग्रेसमध्ये प्रवेश केला आहे. रावेर तालुक्यातील ६० भाजप पदाधिकारी व कार्यकर्ते यांनी रोहिणी खडसे – खेवलकर यांच्या मुक्ताईनगर येथील निवासस्थानी खडसे यांच्या उपस्थितीत राष्ट्रवादी काँग्रेसमध्ये प्रवेश केला. तर दुसरीकडे अहमदनगरमध्येही श्रीरामपूर तालुक्यातील भाजपच्या ३१० बुथप्रमुखांपैकी २५७ बुथप्रमुखांसह सदस्यांनी पदाचा राजीनामा दिला आहे.
