जळगाव : प्रसूतीवेळी हलगर्जीपण व निष्काळजीपणा केल्यामुळे पूजा जयप्रकाश विश्वकर्मा (वय २९, रा. श्रीकृष्ण कॉलनी) या महिलेचा मृत्यू झाला होता. याप्रकरणी डॉ. तिलोत्तमा गाजरे यांच्याविरुद्ध जिल्हापेठ पोलिस ठाण्यात गुन्हा दाखल करण्यात आला आहे.
शहरातील श्रीकृष्ण कॉलनीतील पूजा विश्वकर्मा यांना प्रसूतीसाठी पोलिस अधीक्षक कार्यालयासमोरील गाजरे हॉस्पिटल येथे दाखल करण्यात आले होते. दि. २१ जानेवारी २०२२ ते दि. २२ जानेवारी २०२२ दरम्यान प्रसूती वेळी व प्रसूतीनंतर अतिरक्तस्त्राव झाला. त्यानंतर या महिलेचा मृत्यू झाल्याची घटना घडली होती. या संदर्भात मयत महिलेच्या कुटुंबीयांनी डॉक्टरांवर आरोप करत या प्रकरणी गुन्हा दाखल करण्याची मागणी करुन लेखी तक्रार दिली होती. त्या तक्रारीची दखल घेत वैद्यकीय समितीसमक्ष मृतदेहाचे शवविच्छेदन करण्यात आले होते.
मृत्यूचे नेमके कारण शोधण्यासाठी तज्ज्ञ डॉक्टरांच्या पथकाने दिलेल्या अहवालानुसार उपचारात हलगर्जीपणा केल्याचा ठपका ठेवण्यात आला होता. वैद्यकीय अहवाल आणि चौकशीअंती या प्रकरणी मयत विवाहितेचे पती जयप्रकाश जियालाल विश्वकर्मा (वय ३४) यांच्या फिर्यादीवरुन जिल्हापेठ पोलिस ठाण्यात गुन्हा दाखल करण्यात आला आहे. पुढील तपास सहाय्यक पोलिस निरीक्षक मीरा देशमुख करीत आहेत.
