पल्लकड (वृत्तसंस्था) देशामध्ये मेट्रोमॅन म्हणून नाव मिळवलेले ई श्रीधरन यांना मुख्यमंत्रिपदाचे उमेदवार घोषित करत भाजपाने केरळमध्ये विधानसभा निवडणुकीसाठी कंबर कसली होती. आज सुरू असलेल्या मतमोजणीमध्ये केरळमध्ये भाजपाला फार मोठे यश मिळताना दिसत नसले तरी ई. श्रीधरन यांनी आपल्या मतदारसंघात मोठी आघाडी घेतली असून जवळपास २ हजार मतांनी आघाडीवर आहे.
केरळमध्ये रविवारी सकाळी मतमोजणी सुरू झाली आहे. सुरुवातीचे कल हाती आले आहेत. त्यात भाजपचे उमेदवार मेट्रोमॅन इ. श्रीधरन हे पलक्कड विधानसभा मतदारसंघातून जवळपास २ हजार मतांनी आघाडीवर होते. पलक्कडमधून मिळालेल्या माहितीनुसार, श्रीधरन यांनी सुरुवातीचे निकालात आघाडी घेतली आहे. एक्झिट पोलमध्ये काँग्रेसचे उमेदवार शफी पराम्बिल, श्रीधरन आणि डाव्या पक्षाचे उमेदवार यांच्यात काट्याची टक्कर होईल, असे भाकित वर्तवले होते. २०१६च्या विधानसभा निवडणुकीत पराम्बिल हे विजयी झाले होते. त्यावेळी भाजपचे उमेदवार हे दुसऱ्या स्थानी होते.
सुरुवातीचे कल हाती येऊ लागले आहेत. माकपच्या नेतृत्वाखालील सत्ताधारी एलडीएफला राज्यातील १४० पैकी ७५ जागांवर आघाडी मिळाल्याचे दिसत आहे. तर काग्रेसच्या नेतृत्वाखालील युडीएफला ५६ जागांवर आघाडी मिळाली आहे. भाजपच्या नेतृत्वाखालील एनडीए पलक्कडमधील दोन्ही जागांवर आघाडीवर आहे. नेमोन येथून मेट्रो मॅन इ. श्रीधरन हे रणांगणात आहेत.
